Meg mindig i lek schukareder cajt ando bersch…
I Gertrude Gussak ando „Romengero-jarko“ Schtegate upre bartschini taj meg mindig odoj dschil. La igen baro vuskipe use lakero dajengero taj dadengero kher taj la Romengera sidlungaha Schtegate hi. I deschuenja pantschvardesch taj ofto upro them ali rentnerkija, meresch pal gondolinel upro phure cajtscha taj phukal, sar oj i adventiskeri cajt ande lakero tschavoripe ando „Romengero-jarko“ Schtegate, terdschivtscha. Le lek buteder Romen, ande oja cajt, nisaj tschatschikani buti sina. Poar lendar iste kudulinahi, kaj lengera familija valaso te hal sina. „Mange ojs tschaj, ham mindig jek igen schukar cajt sina“, afka i Gertrude Gussak.
Radijo „Roma sam“ | 19to decemberi 2022 | 20:50 orenge
Duach i sendung vodinel Susanne Horvath | Live Radio Burgenland
Jek boschitschani tradicija ando „Romengero-jarko“ Schtegate ande lakero tschavoripe, o khetano kherodipe la epaschiratakera mischatar sina, afka i Gertrude Gussak. Ande lakeri familija mindig dosta te hal taj te pil delahi. Sako bersch, andi Kedveschni Rat, la Gertrudejakero dad jek schunka avre kojenca thavlahi taj jek ajgeni kerdo schlivengero tee. Le tschavenge ando bischupanschto decemberi te tikne diptscha delahi.
Adi, na dschin buter but manuscha andi Romengeri sidlung Schtegate. Taj te barikane tradiciji buter na del, ham la Gertrude Gussakake meg mindig i lek schukareder cajt ando bersch hi. Butvar o mirnipe taj o boschitschano hango, igen meresch kamel. Lakere familijakere dschene pomoschinen lake uso upre schuscharipe le kherestar taj le boschitschane kaschtestar, savo usi Gertrude khere te falinel na tromal, afka sar te o boschitschano pekipe taj jek barvalo upre utschardo stolo.
Sako berschengero adventiskero mulatintschago le Romendar
I Manuela Horvath andi Romengeri sidlung Erbate upre bartschini. Adi, oj foroskeri rotkija Erbate hi taj o schero la Romengera pastoralatar la diöcesejatar Tikni Martona. I organisacija i kultureli identiteta le Romendar soraljarel, gondolipeskere mulatintschagenge pomoschinel taj ladiptscha Cejiste organisirinel. Andi adventiskeri cajt mindig te krejativi paloplantscha le tschavenge del taj sajt o bersch duj eseri taj ofto, sako bersch, jek adventiskero mulatintschago ande jek Romengeri sidlung ando Burgenland tel likerdo ol, afka i Manuela Horvath.
I Manuela Horvath andar jek bari familija hi. Boschtischa use late igen feschtim taj sorale hangoha sina. Taj te na, akor afka sina, sar uso avre dschenengere familiji. Barikane tradiciji nan lake ando gondo. Boschitschano kascht dija taj o tschave te mindig diptscha uschtidnahi, afka i foroskeri rotkija, Manuela Horvath.
Amara sendungake, i Romni jek moderni boschitschani historija kisetintscha. Oj pedar golfiskere lobdi, guliptscha, poschi taj schejro phukal. Adala historijaha kamla i Manuela Horvath upre te sikal, hot mindig diklo iste ol, saj koji ando dschivipe barikane hi taj saj prijoritetscha peske valako ando dschivipe taj andi boschitschani cajt, bescharel.