O Attila Somogyi sajt but berscha o schero la flogoskera utscha ischkolatar le burgenlanditike ungrikendar hi. Le „Warter Mulatsagiha“ kamla ov taj leskero farajn, o mindenfelitiko la regijonatar te sikal taj dschivdon te kerel. „Mulatsag“ andi nimtschki tschib „Fest vaj Feier“ butschol. O alav andar i ungriki tschib al taj te adi meg ando Burgenland lim ol. I ungriki tschib taj kultura hor ando Burgenland favurclim hi, phenel o Attila Somogyi.
Ojs Wart i regijona pasche Erba akardi ol. Afka upre diklo ulo, hot o muschikakere grupn uso „Warter Mulatsag“ andar i regijona an taj kaj te o cile flogoskere grupn le Burgenlandistar muschikaha fatretim hi. Pasche i Öri Banda, kaj o Attila Somogyi o bandakero schero hi, te i ungriki flogoskeri khelipeskeri grupn Erba, i tamburica Vlahija Bandulatar, Romano Rath taj o Rangers fatretim sina.
Radijo „Roma sam“ | 5to decemberi 2022 | 20:50 orenge
Duach i sendung vodinel Susanne Horvath | Live Radio Burgenland
Sajt ada bersch, o Attila Somogyi, o anglebeschaschi le flogoskere grupnengere bajrotistar le ungrikendar hi. Jek igen barikano aunpaschlojipe hi leske o tschibtschakero upre likeripe. Afka, sar te usi flogoskeri grupn le Romendar, i dajakeri tschib, butvar la terneder generacijatar tschak tschuli vakerdi ol.
I burgenlanditiki Romengeri-banda Romano Rath, upre ada kirati jek pomoschagoskero upre vrischtschanipe le tschavengere harhalijeskere pomoschagoske la St. Anna tschavengera schpitake taj igen latscho hango lengera mindenfelitika muschikaha, kertscha. Le dschilaschiske la bandatar, Gustav Horvath, jek schukar terdschijipe sina uso „Warter Mulatsag“ use te ol taj la flogoskera grupn le Romendar, te fatretinel.
Telal o kherodaschtscha sina te o biro Erbatar, Georg Rosner. Ov o khetan likeripe le flogoskere grupnendar, o khetanipe taj o mindenfelitiko angle asdija. I regijona Erba o Rosner ojs angle sikajipeskero koja la cila Austrijake dikel. Bajder, ov leskero palikeripe le organisatorenge adale schukar interkultureli kiratistar ar dschumintscha.