Tanja Pap ando vakeripe | Boschitscha ande lakeri familija taj lakero dschivipe ojs Romni

I Tanja Pap taj lakeri familija naphandle kristscha hi. On i Kedveschni Rat ando bischuschtarto decemberi mulatinen. Boschitschane tradiciji, sar amen len prindscharas, upre ada di, na on mulatim, ham i familija o cilo di khetan hi. Peklo ol taj te dosta loj dija, akor upre ada di te mas te hal del. Tradicijoneli mulatim ol ando trandajekto decemberi uso berscheskero irinipe.

I Tanja tschorikan lakera dajaha taj lakere schov phenjenca taj phralenca, ande jek Romengeri-sidling ande Uschgorod, pasche i ungriki granica, upre bartschini. Lakero dad mulo, kada oj desch berscha phurani sina. Imar ojs tschaj, iste oj lakera dajaha o poschtitovtscha schuscharlahi, mint oda i jekoschni buti sina, loj te rodel. Andi ischkola i Tanja naschtig geli, mint lakeri daj na dschanlahi o ischkolakere loj taj o pekamle sikajipeskere materijaltscha, te potschinel.

I Tanja Pap mindig ando kontakto lakere dschenenca taj pajtaschenca hi, save meg andi Ukrajnija hi. O manuscha ande bibastale dschivipeskere situaciji taj andi dar, dschin. Habeskere koji, draba taj fitintschagoskero materijal, falinen. Manuschengere tschatschipeskere organisaciji taj schponsortscha, thade habeha taj rotschenca le tschavenge, pomoschinen. O lek buteder lendar, o vilago pal pumende mukle, phenel i Tanja Pap.

Andi Austrija i dijakonija upri familija Pap dikel. Pasche, te pomoschago privati dschenendar taj le Emmerich Gärtner-Horvathistar taj leskere farajnistar Roma-Service uschtiden, save i Tanja kamlo Charly akarel. La Tanjakere tschave Erbate andi ischkola dschan taj te o siklipskero pomoschago le farajnistar Roma-Service, kher roden.

Dschimeg o haburi andi Ukrajnija hi, i Tanja taj lakeri familija, ande lakero hajmatakero vilago naschtig pal dschal. O maschkarutno punkto la terna Romnjatar, lakere tschave hi. Lengera cukunftake kivaninel peske, hot ando smirom, nisaj tschoripeha taj latsche sikadipeskere schajiptschenca, upre te bartschol dschanen.