O flogoskero grupnengero magacin jekoschno andi historija le ORF-istar hi. Ando schov autochtoni flogoskere grupnengere tschibtscha falati del. O moderacijontscha andi nimtschki tschib hi. La neva sendungaha o ORF meg jek seletoskeri forma le schov aun prindscharde flogoskere grupnenge andi Austrija del. Le thaneskere direkteri le ORF-istar Burgenland, Werner Herics, bari voja hi, kaj i dugi planimi sendung akan sikadi schaj uli.
Radijo „Roma sam“ | 19to septemberi 2022 | 20:50 orenge
Duach i sendung vodinel Susanne Horvath | Live Radio Burgenland
Sako dujto kurko akan i sendung, 8:45 orenge, ando ORF III te dikel hi. Paloda hi li efta divesa andi ORF-TVteka. Moderirim ol o flogoskero grupnengero magacin jefkar la burgenlanditika horvackijatar Julia Hamedinger taj jefkar la burgenlanditika Romnjatar Katharina Graf-Janoska. La Graf-Janoskake, savi te i sendung „Romano Dikipe“ moderirinel, jek baro pativ hi, erschtivar le flogoskere grupn, te pedar o burgenlanditike granici ari, te presentirinel te tromal. Butvar la flogoskera grupn le Romendar te representirinel taj buteder ando dikipe le pradipestar te terdscharel, lake igen barikano hi.
Imar ando 6to septemberi i sendung „WIR“, ando ORF thaneskero schtudijo Burgenland, ande jek mulatintschagoskero keripe, presentirim uli. Kerdi ol i sendung la flogoskera grupnengera redakcijonatar le ORF-istar Burgenland ando khetan butschalinipe la slovenitika redakcijonaha le ORF-istar Kärnten. Le scheroske la flogoskera grupnengera redakcijontar Burgenland jek bari buti sina, jek efta tschibtschakeri sendung upro pre te terdscharel. Butvar o jekoschne falatoskere redakcijontscha le flogoskere grupnendar palo projekto terdschon taj igen but use ledschine, i sendung te kerel, phenel i Dorottya Kelemen.
Usi presentacija la sendungatar „WIR“ ando ORF thaneskero schtudijo Burgenland, te o anglebeschaschi le flogoskere grupnengere bajrotistar le Romendar, Emmerich Gärtner-Horvath, use sina. Leske i efta tschibtschakeri produkcijona jek barikani taj historischi joma ando austritiko medijengero than hi. Sikal, hot o schov autochtoni flogoskere grupn la Austrijatar jek hi. Butvar o medijali entviklinipe la flogoskera grupnatar le Romendar khetan le ORF-iha Burgenland, o bajrotiskero anglebeschaschi le Romendar, Emmerich Gärtner-Horvath, angle asdel.
I arti sendung le efta tschibtschakere flogoskere grupnengere magacinistar „WIR“, ando 25to septemberi, 8:45 orenge, ando ORF III te dikel hi.