I dschuvli le anglebeschaschistar le flogoskere grupnakere bajrotistar le Romendar, pomoschinel le tschavenge use lengere ischkolakere butja, le meschterenca ar pe parul pedar o koji, save meg feder kerde iste on, vojaschne kheliptscha and te perel peske mukel vaj upri krejativiteta le ischkolaschendar ande dschal. I Susanne Gärtner-Horvath te i linajiskeri ischkola le farajnistar Roma-Service kertscha, savi te pomoschinel, le tschaven poloke uso ischkolakero di taj uso ischkolakero siklipe te vodinel.
Radijo „Roma sam“ | 12to septemberi 2022 | 20:50 orenge
Duach i sendung vodinel Susanne Horvath | Live Radio Burgenland
O siklipeskero pomoschago le tschavenge la flogoskera grupnatar le Romendar, imar sajt buteder sar tranda berscha del. Jek le erschti butschaschendar sina o adiveseskero Romani meschteri taj prikbescharaschi Josef Schmidt. Ov phukal pedar o entviklinipe taj o angle dschajipeskere jomi le projektostar. Butvar i komunikacijona le meschterenca ando ischkoli meg feder hi taj oda use vodinel, hot te o siklipeskere ciltscha le tschavendar feder schofim schaj on, afka o Schmidt.
Ando bersch 2017 o farajn Roma-Service o siklipeskero pomoschago le Romengere tschavenge prik lija taj ar baunintscha. Uso lejcti virtschoftlichi lojengero planinipeskero proceso ham harnjariptscha dija. Upral duj siklipeskere dschene akan upre jek cilo taj jek epasch dscheno reducirim ulo. Vasch i Corona-pandemija o tschave taj o terne meg poar koji palal iste butschalinen. Taj akan te pantsch Romengere tschave andar i Ukrajnija jek falato le siklipeskere pomoschagostar hi, phenel o Emmerich Gärtner-Horvath, schero le farajnistar Roma-Service.
La cukunftake kivaninel peske o Emmerich Gärtner-Horvath buteder siklipeskere butschaschtscha le siklipeskere pomoschagoske, kaj meg feder upro pekantschage le cile ischkolaschendar and gelo schaj ol. Ojs visijonari le meg poar plantscha le siklipeskere pomoschagoha hi. Butvar o nevo flogoskero grupnengero kher Erbate, savo o nevo than le farajnistar Roma-Service ovla, ojs schajipe jeke bareder siklipeskere pomoschagoskere projektotar dikel.