Emmerich Gärtner-Horvath, Andreas Sarközi, Martin Horvath, Mirjam Karoly, Helmut Schüller, Katharina Graf-Janoska, Matthias Platzer, Manuela Horvath.
Roma-Service
Roma-Service
ROMA SAM | FLOGOSKERI GRUPNAKERI POLITIK

Flogoskero grupnakero bajrot le Romendar nevo kerdo ulo

Palo phendo le ministeriskere rotistar, ando august o flogoskere grupnakere bajrotscha ando bundakero kancleriskero birovtschago neve kerde ule. Sake schtar berscha o flogoskere grupnakere bajrotscha le schov, andi Austrija aun prindscharde flogoskere grupnendar, neve kerde on.

O Emmerich Gärtner-Horvath le farajnistar Roma-Service, uso anglebeschaschi le flogoskere grupnakere bajrotistar le Romendar, völim ulo.

Emmerich Gärtner-Horvath
ORF
Emmerich Gärtner-Horvath | Bajrotiskero anglebeschaschi le Romendar

O flogoskere grupnakere bajrotscha jek barikano falato keren, o kultureli, socijali taj virtschoftlichi interesi la flogoskera grupnatar upre te likerel taj te fatretinel. Uso berotinipe le bundakere kancleristar taj la bundakera regirungatar ande flogoskere grupnakere aunpaschlojiptscha, ando bundakero kancleriskero birovtschago o flogoskere grupnakere bajrotscha kerde ule. O flogoskero grupnakero bajrot le flogoskere grupnakere dschene andi Austrija fatretinel taj le austritike Romen te pedar o granici representirinel, afka o Emmerich Gärtner-Horvath.

Volksgruppenbeirat der Roma 1995
ORF

Sajt 1995 o flogoskero grupnakero bajrot le Romendar del. Palo mulipe le Rudolf Sarközistar ando bersch 2016, o Emmerich Gärtner-Horvath, i funkcijona le anglebeschaschistar le Romendar prik lija. La neva perijodake but angle peske lija. Jek barikano cil hi, hot i historija le Romendar ando ischkoli buteder integririm ol, odoleha o teldikiptscha taj i diskriminacija tel baunim te on. Te o Romengere strategiji 2030 jek barikano falato andi buti le flogoskere grupnakere bajrotistar khelna.

Radijo „Roma sam“ | 5to septemberi 2022 | 20:50 orenge

Duach i sendung vodinel Susanne Horvath | Live Radio Burgenland

Ando lejcti bersch o anglebeschaschtscha le schov austritike flogoskere grupnendar khetan jek ajgeni farajn kerde, savo o anav „Ständige Konferenz“ ledschel. O flogoskere grupn khetane projekti keren taj ande but koji vuske khetan butschalinen. Jek khetano projekto la organisacijatar le khereha la historijatar Austrija planim hi. Ando schov tschibtscha le autochtoni flogoskere grupnendar, i austritiki historija te schunel te del.

Emmerich Gärtner-Horvath
ORF

O Emmerich Gärtner-Horvath la cukunftake la flogoskera grupnake le Romendar oda peske kivaninel, hot o teldikiptscha taj i diskriminacija tel len. Bajder phenel, hot obocht dim ist ol anglo aktujeli kristscha, sar o haburi andi Ukrajnija taj o koschtalinipeskero utschjaripe, savo odoleha khetan hejnginel, mint butvar ande virtschoftlichi bibastale cajtscha, o hosinipe taj o rasismus mindig buteder ol.