Artschijipe | Creating Spaces – Amare Thana

O mangipe pal jek centrali gondolipeskero than Betschiste, le ando nacijonalsocijalismus murdarde Romenge taj Sintijenge Betschiste, imar sajt but berscha del. Paloda, pumen o fatretertscha taj o fatreterkiji la flogoskera grupnatar ando keripe le projektostar „Dream-Road“ online ar parude, ada mangipe akan konkreti formtscha aun lija. I reporterkija, Gilda Horvath, jek posicijonakero papruschi pisintscha, le statementenca taj usephenipenca uso gondolipeskero than, le bojd cile Romengere farajnendar taj aktivistendar. Ada posicijonakero papruschi ando 7to april 2022 andi Hofburg taj ando 8to april ando parlamento le politischi fatreterenge prik dim ulo. I politik primintscha, hot jek gondolipeskero than dela, afka i Horvath ando vakeripe.

Sajt o kesdipe le augustistar, del akan te jek artschijipe use ada mangipe pal jek centrali gondolipeskero than le ando nacijonalsocijalismus murdarde Romenge taj Sintizzenge ando bundakero scheroskero foro. I Gilda Horvath phukal, so le artschijipeskere kherodaschtschen uscharel: O hangi le grupnendar, save adaj dokumentirim taj ar tschite on, imar adi jek falato la historijatar hi – odola historijatar, sar ada gondolipeskero than Betschiste kerdo ol. Te o schajipe del le cilenge, lengero pomoschago adale gondolipeskere thaneske, ar te dschuminel. Vaschoda i website gemeinsam-erinnern.info online terdschardi uli.

Jek gondolipeskero than i manifestacijona le gondostar le kerde na tschatschipestar hi, i erschti joma hi jeke tschatschikane aunprindscharipestar odolestar taj i basis jeke hori upre butschalinipestar taj jeka refleksijonatar, afka i Horvath. Ada proceso pekamlo hi, kaj o esbe lipe la historijatar, sar li dschijakana hi te barvaljarel, le grupnakere hangoha.

O gondolipeskero than butenge sikavla, hot te o Roma taj o Sinti ando nacijonalsocijalismus tradim taj murdarde ule taj hot odoleha o ferantvoatinipe andi adiveseskeri cajt adaj hi, upre te dikel, hot asaj koja, schoha buter kerdo na ol. Mint gondolipeskere thana te use schaj ledschen, diskriminacija tel te bauninel, afka i Gilda Horvath. Ham te o gondolipeskero than „tschak“ jek bar ulo, akor ada procose ojs igen pharo pe sikal. Ham te jek gondolipeskero than ojs dschivdono than le arparujipestar taj le sikadipestar taj le interkultureli dialogostar diklo ulo – akor dschanel asaj than, igen but uso tel bauninipe la diskriminacijtar use te ledschel.

I Eva Blimlinger, le Selenendar, phentscha ande lakero vakeripe andi Hofburg ando 7to april 2022, hot oj patschal, hot jek gondolipeskero than Betschiste, imar 2023 rejaliteta ovla. Ando septemberi, duj and ledschime pisiniptscha ando parlamento, diskutirim ovna: Jek uso aunprindscharipe le 2te augustistar ojs internacijonali Romengero-holocaustiskero gondolipeskero di andi Austrija, taj jek vasch o pekamle loj le gondolipeskere thaneske Betschiste. Konkreti than vaj plan le prik bescharipestar le gondolipeskere thanestar meg na del, ham i Gilda Horvath loschandi hi, hot adaj but pomoschago andar o riktscha le Romendar taj Sintijendar ham te andar o riktscha le avre khetanipestar del. I grupn aktivi ando keripeskero proceso ande te anel pe kamla, afka i Horvath.

Tel te uscharel hi, obste o gondolipeskero than, imar ando arto bersch presentirim ol. O artschijipe „Creating Spaces | Amare Thana“ meg dschi uso 30kero august, kher rodim schaj ol. Taj ko pro use schtiminipe uso gondolipeskero than ar te dschuminel kamla, dschanel oda telal www.gemeinsam-erinnern.info te kerel.