O Alan Bartus andar jek muschikaschengeri familija al, leskero dad Stefan andi internacijonali muschikakeri scena jek barikano jazziskero-bumbaschi hi. Afka o Alan imar ando terne berscha la muschikaha, butvar le jazziha, ando aunvastaripe alo, savo adi leskero lek bareder kamipe hi. Paloda ov poar instrumentscha probalintscha, schtar berschenca klavir te cidel kesdintscha. Odotar aun, intensivi te siklol kesdintscha.
Kekaj leske o siklipe ande ada phuripe pharo pelo, ov bajder kertscha. Te leskero dad pomoschinlahi leske taj mindenfelitike techniki andar i klasischi muschika leskes sikatscha. 12 berschenca o Alan imar use mindenfelitike internacijonali muschikakere-beverbtscha aun tretintscha, use save ov butvar o jerinaschi sina. 13 berschenca dschantscha ov, hot profesijoneli muschikaschi lo te ol kamla – 16 berschenca imar pre erschti koncertscha dija.
Kada o Alan Bartus 12 berscha phurano sina, leskeri familija i Slovakija pal peste mukla taj andi Austrija ali. I daj taj o dad le tschavenge o schajipe upre jek feder dschivipe te del kamlahi. Ando kesdipe pharo sina, le pajtaschtschen pal te mukel taj jek nevi tschib te siklol, ham i familija sik and pe dschivtscha. Akan Neusiedl am See o kheripe le Alan Bartusiske taj leskera familijake hi, sar ov phukal.
Leskere telschtaminipeha ov adi igen prado um dschal, kekaj ada na mindig afka sina: Mint andi Slovakija soraleder rasismus gejng o Roma taj Romnja dija, afka o Bartus. Obocht dim ulo andi phuri hajmat, ham adi ojs mursch use pre vurclini terdschol.
„Jazz jek tschib hi, savi tro cilo dschivipe schtudirines.“
Paloda ov muschikakere ischkoli andi Slovakija taj ande Neusiedl am See kher rodija, ojs terno upro konservatorijum Betschiste parutscha. 17 berschenca o uprelipe upri universiteta la muschikake taj la sikada kunstake Betschiste schofintscha. Odoj erschtivar arsiklipe ando klasischi ham te ando jazziskero-than kesdintscha. Leskero vodschi ham usar o kesdipe aun, buteder le jazziske tschalavlahi, vaschoda kesdintscha ov pe mindig buteder upre te schpecijalisirinel: „Jazz jek tschib hi, savi tro cilo dschivipe schtudirines. Jek spiritujeli ardschumipe“, phenel o Alan Bartus.
Radijo „Roma sam“ | 1ti august 2022 | 20:50 orenge
Duach i sendung vodinel Susanne Horvath | Live Radio Burgenland
Leskeri aktiviteta taj leskeri ambicijona, na dur pal, ar pe potschintscha: Erschtivar ov o barikano Ö1 jazziskero schtipendijum uschtidija taj dujtovar jek kamlo schtipendijum andi Manhatten School of Music, savi use jek le lek feder ischkolendar upro them genel. Akan o Alan Bartus upro schponsorengero rodipe hi, mint o schtipendijum tschak 70 procenti le koschtalinipestar tel utscharel.
„Muschika mange smirom hi taj oda kama ando cilo them te ledschel“
Jek barikano terdschijipe ande leskeri karijera, tel diklo le duj barikane schtipendijendar, le Alan Bartusiske o koncerto „40 Jahre Kammermusikfest Lockenhaus“ ando lejcti berscha sina, kaj ov but barikane muschikaschenca cidija.
O Alan Bartus mindig leskere trijoha, o „Alan Bartus Trijo“ Betschiste, andi Slovakija taj Tschechija te schunel hi. Na dur pal, ov pro erschti album le anaveha „Born in Millennium“ upre schaj lija, savo meg ada berscha ari te al. Ham te ojs solisto o Alan Bartus upre but internacijonali thana te lakel hi. Adaj ov mindig jeke barikane ciliske palal dschal: Muschika le Alan Bartusiske smirom hi taj oda kamla ov ando cilo them te ledschel.
Ande leskeri naphandli cajt o 21-berschengero lek merescheder pra pajtaschkijaha hi. Ham leskero baro kamipe, i muschika, akan but cajt lestar mangel, ada te vasch leskeri aktiviteta hi. Amen andi cukunft meg but le Alan Bartusistar dikaha taj schunaha.