I ungriki flogoskeri muschikakeri grupn Csörge, savi imar but berscha upro Roma-Butschu fatretim hi, iste vasch Corona tel phentscha. Kekaj afka sina, i ungriki flogoskeri grupn ham fatretim sina. O bajrotiskero anglebeschaschi le ungrikendar andi Austrija khetan leskera dschuvlaha uso Roma-Butscha alo taj telal o kherodaschtscha pe beschartscha.
Muschikaha la tamburicakera-grupnatar „Vlahija“ Bandulatar, o kirati pradim ulo. O anav la bandatar jek aunpaschlojipe upri regijona hi, andar savi oj al taj ando nimtschko butschol Walachei. O than paschlol upro sud dombo le Günser dombostar ando becirk Erba. Le scheroske la tamburicakera grupnatar Dominik Tallian, le akaripe uso Roma-Butschu, jek igen utscho terdschojipeskero vert hi.
Radijo „Roma sam“ | 11to juli 2022 | 20:50 orenge
Duach i sendung vodinel Susanne Horvath | Live Radio Burgenland
O muschikakere sikajiptscha uso sako berschengero mulatintschago andi erschti rik terdschon. I banda „Romano Rath“ imar sajt tranda berscha kherodaschi uso Roma-Butschu hi taj jek soralo falato le muschikakere programistar. O bandakero schero Gustav Horvath igen loschanel pe, pal duj berschengero ar bescharipe vasch Corona, papal adaj uso Roma-Butschu leskera bandaha use te ol.
I ando bersch 2019 kerdi „Leon Berger Band“ ada bersch, erschtivar uso Roma-Butschu fatretim sina. Lengere mindenfelitike hangijenca on latsche hangoske telal o kherodaschtscha sorginde. O dschilaschi la Romengera-bandatar Martin Horvath, te o moderatori le kiratistar sina taj le kherodaschtschen maschkar o feschtimo programo vodintscha. O cidipe leskera bandaha ando cile koji esbe lija.
Jek avri premijera uso ada berschengero Roma-Butsch, mulatintscha i banda „Romano Glauso“ andar i Slovenija. O bandakero schero taj giteraschi Darko Rudas, ande leskeri hajmat te andi politik fatretim hi. Ando gemajndakero rot ande Murska Sobota, ov o aunpaschlojiptscha la flogoskera grupnatar le Romendar, fatretinel. Uso ada berschengero Roma-Butschu akardo te ol, leske taj leskera bandake, jek bari pativ sina.
Kerdo ulo o Roma-Butschu le bajrotiskere anglebeschaschistar la flogoskera grupnatar le Romendar, Emmerich Gärtner-Horvarth taj leskere dschenendar andar o farajn Roma-Service. O mindenfelitiko le Burgenlandistar te sikal, leske jek barikano falato le mulatintschagostar hi. Ov te mindig loschanel pe, te Romengere-bandi andar avre vilagi uso sako berschengero mulatintschago fatretim hi.
O kherodaschtscha use latschi muschika, schudro pibe taj tradicijoneli austritiko habe, jek mulatintschago le mindenfelitikostar mulatinde, savo butvar o latschipe taj o khetanipe le Burgenlandistar sikatscha. Telal o kherodaschtscha te i thaneskeri rotkija Doris Prohaska sina, savi butvar le latsche hangostar uso Roma-Butschu Mischkate vakertscha.