But Romnjenge o drom ande jek naphandlo, ajgeni dschivipe meg mindig jek barano hi. Barikano hi odolen te sikal, save meg mindig ando garujipe dschin. Usar o kesdipe aun lakero cil sina, odole dschuvlen andar o garujipe te hulinel taj te sikal, phenel i Radosavljević.
O cil mukipe hi
Te pedar Romnja andi Austrija vakertscham, iste diklo ol, obste odola adaj upro them ale vaj na, afka i Zaklina Radosavljević. Mint Romnja migracijonakera scenaha, butvar mindenfelitike problemca iste dschin, afka sar jek pharo usedschajipe uso sikadipe taj uso butjakero foro. Ham o anticiganismus meg mindig soralo hi, taj odolestar o cile Romnja reste hi, phenel i Radosavljević. Oj odolenge and pe bescharel, saven meg mindig nisaj hango hi taj butvar na dikle on. O Romnja Betschiste butvar mindenfelitika diskriminacijake ar bescharde hi.
Radijo „Roma sam“ | 27to juni 2022 | 20:50 orenge
Duach i sendung vodinel Susanne Horvath | Live Radio Burgenland
O cil mukipe hi: Ada probalinel o farajn duach mindenfelitike workshops te schofinel. But dschuvla meg mindig ande patrijarchali strukturtscha dschin, vaschoda barikano hi thana te schofinel, kaj le dschuvlenge latsche dschal taj kaj tschak vasch lengere mangiptscha dschal. Adaleha kamla o farajn „Vivaro Viva Romnja“ jek gondo te schofinel taj le dschuvlen le workshopendar afka use multiplikatorkiji te kerel.
Latsche thana le dschuvlenge
O dschijakana tel likerde workshops adale tematschenca donde pumen bescharde: Internacijonali Romengero-Di, mujsinipeskero soharipe, partneriskero maripe taj atschipeskero tschatschipe. Butvar o maripe ande jek partnerengero khetanipe jek tema hi, savo but dschuvlenge, uso bibastalo sako diveseskero dschivipe kerinel. O farajn „Vivaro Viva Romnja“ pedar adala tematscha te informirinel taj upre te klerinel kamla taj afka le dschuvlenge pomoschago aun te bijatinel, savo butvar on na uschtidnahi.
O workshops ando keripe le projektostar „Amari Zor“ – „Unsere Stärke“ kerde ule, savo ando terno dschend 2021 kesdim ulo. Avre ciltscha hi o arparujipe, informacijonakero- taj dschanipeskero bajder dipe taj o interaktivi butschalinipe khetane putrinipeskere strategijendar, anticiganistischi taj patrijarchalischi strukturtscha palal te phutschel taj gejng lende te kejmpfinel. Kaj o cile use schaj on, o workshops ande buteder tschibtscha, butvar ande Romanes taj BKS, tel likerde on. I prik bescharipeskeri butio keren o aktivistkiji. Parlaleli use, te mindig jek dikipe upro tschave, aun bijatim ol.
O workshops Romnjenge taj dschuvlenge andar o avro khetanipe hi, ando linaj taj butvar ando terno dschend, avre workshops taj te roastscha del. Buteder informaciji, laken tumen telal www.vivaro.at