But eseri Roma ande Saintes Maries de la Mer an
Feschtime urtschime schtatuji la Dschelna Saratar, uso uferi ledschim on taj le pajiha, andar o baro paj, sapajarde le on. Le organisatoriske la roasatar, Andreas Lehner, barikano sina, i roas latsche te planinel, kaj igen but la regijonatar diklo schaj ol.
Ando di la procesijonatar, but eseri Romnja taj Roma andar mindenfelitike vilagi la Europatar talalinde pumen, molintschagenca taj muschikaha upre lengeri arakipeskeri patronkija te gondolinel. Le but pilgerenge igen barikano hi, jek paschipe usi figura la Dschelna Saratar upre te bauninen, afka o Andreas Lehner.
Radijo „Roma sam“ | 20to juni 2022 | 20:50 orenge
Duach i sendung vodinel Susanne Horvath | Live Radio Burgenland
O ando bersch 1961 upro them alo Andreas Lehner, imar ande leskeri tschavengeri cajt, igen but Romnjenca taj Romenca, khetan sina. O bombakero atentato ando bersch 1995 Erbate, kaj schtar Roma murdarde ule, jek barikano momento leske sina, pe la flogoskera grupnake and te bescharel taj jek falato leskera soratar uso feder keripe la situacijatar le Romendar andi Austrija prik te del.
Gondolipeskero than „Camp de Saliers“
O kinstleri Andreas Lehner te odoleske prindschardo hi, gondolipeskere thana, te kerel. Angle poar masektscha, kertscha ov o gondolipeskero bar le tradime taj murdarde Romenge andar Kemeta. Jek gondolipeskero than o Andreas Lehner taj o avre dschene la roasakera grupnatar te ando keripe la schtudijakera roastar andi sud Francija, kher rodine. Ando Camp de Saliers, upro and tschapime Roma usar 1942 dschi 1944, gondolim ulo.
Kipengero artschijipe „I pativ le Romendar“
Uso kisetinipe la schtudijakera roasatar la Roma VHS-atar Burgenland, i roasakeri grupn jek artschijipe la austritika fotografkijatar, Christine Turnauer, savo telal o anav „I pativ le Romendar“ naschel, kher rodine.
Te le arte berscheske, le Andreas Lehner imar jek latscho gondo jeka schtudijakera roasake hi. Kas interesi le aktivitetenge la Roma VHS-atar Burgenland hi, buteder upri homepage la Roma VHS-atar, uschtidel.