30 berscha Romano Centro
O Ilija Jovanović, i Ursula Hemetek, o Mozes Heinschink, i Renata Erich taj o Dragan Jevremović, 1991 o Romano Centro kerde. Adaj jeke gondoske palal gelo ulo, jek farajn le cile Romenge taj Romnjenge te kerel, obste alochtoni vaj autochtoni. Ando maschkaripeskero punkto adaj o upre likeripe la kulturatar taj o sikadipe le ternendar terdscholahi, phukal i keraschkija taj muschikakeri etnologkija, Ursula Hemetek.
Sajt 1996 te i politologkija Mirjam Karoly ando Romano Centro butschalinel, oj akan imar sajt poar berscha jek schero le farajnistar hi. Oj pal gondolinel, sar oj uso Romano Centro ali taj so oda farajn lake use jek barikano koja kerel.
I scheroskeri buti akan i Danijela Cicvarić kerel. I socijali butschaschkija butvar odoleske ande pe bescharel, kaj i Romengeri-ischkolakeri medijacijona bajder schaj dschal, kaj mindig workshops taj projekti terne Romnjenge prik bescharde te on. Adaj te o aktujeli butjakero pharipeskero punkto ando Romano Centro paschlol, afka i Cicvarić.
14to Baranka parkiskero gondolipeskero mulatintschago
Tschak poar kilometerscha bajder, o Baranka parkiskero gondolipeskero mulatintschago sina, ada bersch imar o 14to var. Agun o park jek nugodinipeskero than le Romenge taj Sintijenge sina, savo Heller rito akardo ulo. 2003 o park akor ando palgondolipe upri Helene „Baranka“ Huber, pro nevo anav uschtidija. I tradimi sor palal sino o Johann „Mongo“ Stojka, o enkl la Helene Huberatar. Leskero tschau, o prindschardo jazziskero giteraschi, Harri Stojka, pal gondolinel upri barikani buti leskere dadestar.
Radijo „Roma sam“ | 30to maj 2022 | 20:50 orenge
Duach i sendung vodinel Susanne Horvath | Live Radio Burgenland
O Baranka parkiskero gondolipeskero mulatintschago imar mindig jeke dschivde khetanipeske terdschol – ada sikal pe papal te ando programo: usar i dschidovtschengeri muschika, pedar o betschitike dschila dschi otscha uso Gipsy jazz, sa fatretim hi. Ada sa sikal, saj barikano o khetan likeripe taj o khetanipe hi, phenel o Harri Stojka.
Ando bersch 1941 i Gestapo le cile manuschen, save upro rito dschivnahi, ande logertscha ledschine. O Johann „Mongo“ Stojka, savo ojs tschau leskera familijaha upro rito dschivlahi, jek le tschule dschenendar sina, savo o logeri prik dschivtscha. Vaschoda o Baranka park imar sajt but berscha uso jek, le lek barikaneder gondolipeskere thanendar Betschistar genel, phenel o dujto schero le farajnistar „Voice of Diversity“, Marion Dworczack.
Use so duj mulatintschage, but manuscha ale, tel lende te pajtaschtscha taj but berschengere dromeskere vodaschtscha. So duj mulatintschage upre barikane jomi pal gondolinen, save andi aguni cajt prik bescharde ule taj save, dschi adi, nisaj barikanipe naschade.