Adolf Sarközi bei Gedenktafel
ORF
ORF
ROMA SAM | ANDO DIKIPE

Adolf Sarközi | Ando dikipe

Ande amari sendung, ando 23ti maj 2022, o burgenlanditiko Rom, Adolf Sarközi, amaro kherodaschi hi. Ov phukal pedar leskere esbe liptscha taj terdschijiptscha ojs dscheno la flogoskera grupnatar le Romendar. O adi 63-berschengero, barikano papu duj tschavendar, ando Romengero jarko Schtegate upre bartschino.

Le Adolfiskeri daj muli, ande leskeri aguni tschavengeri cajt. Odotar aun, la familijake na gelo latscho. Leskero dad, savo le logeristar igen pharo traumatisirim sina, na diklahi but upri familija. O tschave korkore adaj terschonahi, o phureder upro tikneder iste diknahi.

Michael Sarközi
Adolf Gussak
Michael Sarközi (Dad le Adolf Sarközistar)

Radijo „Roma sam“ | 23ti maj 2022 | 20:50 orenge

Duach i sendung vodinel Susanne Horvath | Live Radio Burgenland

Andi ischkola o Romengere tschave agun diskriminirim taj ar granicalim ule, butvar andi sonderschul len tschite, phukal o 1959 upro them alo, Adolf Sarközi. Te privati tschak tschulo kontakto uso avre dschene ande aja cajt delahi. O lek buteder daja taj dada na akceptirinahi le, te lengere tschave le tschavenca andar i flogoskeri grupn jek pajtaschtschago likernahi. Afka o dschene la flogoskera grupnatar butvar telal pumende atschonahi. Ando kisetinipe le Romengere jarkostar Schtegate, jek baro poschano than delahi. Oda o khelipeskero than le cile Romengere tschavendar andar Schtega sina, phukal o Adolf Sarközi.

Adolf Sarközi elegant
Adolf Gussak

Ande oja cajt le terne Romen Schtegatar, nisaj cukunftakeri perspektiva vaj tschatschikane schajiptscha upro butjakero foro sina. Kaj o Sarközi ham valaso andar leskero dschivipe te kerel kamlahi, ojs pomoschagoskero butschaschi Betschiste gelo taj odoj upro bauninipe butschalinlahi. Pal poar berscha papal Schtegate kher alo taj ande leskero hajmatakero gav, khetan leskera dschuvlaha, jek ajgeni koja kertscha. On jek kafejiskero kher prade taj le jerinipeha taj le Adolfiskere pradime upre tretinipeha, te i akceptanca le avre dschenendar ali.

Adolf Sarközi mit Christine Gussak
Adolf Gussak

Ande le Adolf Sarköziskero dschivipe but utschiptscha taj horiptscha dija. Jek leskere lek phareder terdschijipeskere kojastar, terdschivtscha ov angle valami trin berscha, kada leskeri dschuvli, 53 berschenca pal jek pharo nasvalipe, muli. Adi o Adolf korkore dschil. Ande leskeri naphandli cajt le tschavenca matschen te astarel dschal vaj o fori ando pasche paschlime gava, kher rodel. Mindig taj meresch, ov upro schukar, phure cajtscha pal gondolinel.