Ruža o dschila le Lovarajendar uso themeskero kulturakero barikanipe kerel
Ando bersch 2011 o dschila le Lovarajendar ojs UNESCO themeskero kulturakero barikanipe aun prindscharde ule. O aun rodipeskero dscheno sina i Ruža Nikolić-Lakatos. Ando dschila le Lovarajendar duj koji del – i poloki lirischi dschili taj i khelipeskeri dschili. Ham te mindig use neve krejacijontscha al. I muschikakeri tradicija dschi adi, use familijakere mulatintschage, upre likerdi ol. Maschkar o nacijonalsocijalismus o Lovara tradim, taj o lek buteder lendar, murdarde ule. Igen resto sina adaj i phureder generacija, savi le bajder dipeske la kulturatar taj la tschibtschatar barikani sina. I Ruža sorale le upre likeripeske la kulturatar la flogoskera grupnatar ande pe bescharlahi. Kada oj meg dschivlahi, phentscha li, hot i muschika, o tschatschikano dschivipe taj i historija le Romendar papal sikal.
I Ruža Nikolić-Lakatos 1945 upro them ali. Oj ande jek tradicijoneli Lovara-familija ande jek gav pasche o ungriko foro Györ, upre bartschini. Avrijal sar lakere dschene, save grastengere biknaschtscha sina, i familija Lakatos palo haburi tel pe mukla taj ande jek tikno kheroro ande jek Romengeri-sidlung ande Pápa, dschivlahi. Lakero dad taj lakero batschi ham i buti jeke grastengere biknaschistar meg bajder kernahi. Kekaj o kher tikno sina taj o dschivipe na asaj latscho, phentscha oj, hot lakeri tschajengeri cajt, igen schukar sina. Butvar i muschika taj o khelipe jek sako diveseskero falato andi familija Lakatos sina. Kada oj meg jek tikni tschaj sina, lakero dad mangla latar, hot oj use jek familijakero mulatintschago, te dschilal. Sajt oja cajt i Ruža jek aun prindschardi dschilaschkija andi flogoskeri grupn sina taj use sako koja, pro muschikakero talento sikavlahi.
Ando bersch 1956, i familija Lakatos vasch o tradipe ando Ungriko, andi Austrija naschi geli. Pal jek harno upre likeripe ande Tirol, on Betschiste jek nevi hajmat lakle. Odoj i Ruža te pre mursche Mišo Nikolić restscha. Khetan lengere tschavenca Mischa taj Sascha, on i banda „Ruža Nikolić-Lakatos and The Gipsy Family“, kerde. Ada o kesdipe jeka igen prindscharda Romengera-bandatar andi Austrija sina.
Radijo „Roma sam“ | 9to maj 2022 | 20:50 orenge
Duach i sendung vodinel Susanne Horvath | Live Radio Burgenland
Mulatintschago ando Betschi Museum
Use lakero 70to bersch, kada oj upro them ali, jek patijardo dschilakero kiriati ando keripe le artschijipestar „Romane Thana“ organisirim ulo. But pajtaschtscha la Ružatar ale taj dschilade taj khelde laha. La kinstlerkijake oda kirati igen loschando sina.
Ruža Nikolić-Lakatos barikanipe
Ando bersch 2019, erschtivar o Ruža Nikolić-Lakatos barikanipe ando betschitiko jazziskero klub Porgy & Bass prik dim ulo. I anaveskeri dijaschkija lakere dschivipeskere verkiske taj lakera bara butjake vasch o upre likeripe la tschibtschatar lakera flogoskera grupnatar, patijardi uli. Nasch nasvalipe, use ada kirati, use naschtig li sina. O barikanipe lakeri enkelkija Shireen Nikolić prik lija. I flogoskeri muschikakeri forscherkija taj etnomusikologkija Ursula Hemetek, but berscha, dromeskeri vodaschkija taj pajtaschkija la Ružatar sina. Ande oda kirati, oj jek patijardi taj igen vodschikani laudacijo likertscha.
Ando 4to maj 2022, i Ruža Nikolić-Lakatos, o than le dschivipestar, pal peste mukla. Ando vodschi lakera familijatar, pajtaschendar taj dschenendar, bajder li dschivla, mint lakera muschikaha taj lakera bara butjaha la flogoskera grupnake, barikane koji kertscha, save schoha pobisterde on.