„Hat, troman odola ada?“ Tschatschipeskere periptscha ando pradimo than

O referat le tschuliptschengere kontaktschenge o cile aunpaschlojiptscha aun peske dikel taj pomoschinel, kaj jek latscho khetan dschivipe le harengerendar le tschuliptschenca te del. Bajder o referat kontakto uso cile birovtschage, organisaciji taj grupn likerel, save ando than le interkultureli dialogostar butschalinen. Imar sajt o kisetinipe le enjavardeschte berschendar o kulturakero farajn le austritike Romendar le harengerenca khetan butschalinel taj adale anglevakeripeha le dschenenge te o khetanipeskere politischi tematscha pasche te anel kamla, save pumen na tschak vasch i flogoskeri grupn le Romendar traden, phenel o botakero vodaschi le farajnistar, Andreas Sarközi.

I tema le anglevakeripestar dija pe, kaj but manuschenge butvar afka dschal, hot on duach o poschtitovtscha phiren, valaso aun diken taj pumendar o phutschajipe terdscharen „Hat, troman odola ada?“. Butvar nan ada dschando, so o tschatschipe use mukel vaj na, vaschoda i thaneskeri direkcijona le harengerendar aja inicijativa kesdintscha, sar o grupnengero inschpekteri Alfred Schön, ando anglevakeripe phukal.

Tel kartschi dipeskere koji ando Silvesteri

Jek peripe adaj ovlahi, o tel kartschi dipe kojendar ando Silvesteri. Adaleske ando foroskero- taj gaveskero than jek fabot del, kekaj afka hi, sako bersch ham papal kerdo lo ol. Ham te lokeder koji del: Te o tel kartschi dipe na direkti ande jek dschivipeskero than, ada butschol oni manuschen te dukal, taj nisaj larma kerdi ol, pasirinel, akor mukipe del. Tel kartschi diptscha na tromal ando paschipe schpitendar, khangerendar, marhengere kherendar, tschavengere- taj phure manuschengere kherendar taj avre kojendar te del, sar o Alfred Schön phukal.

O glajchi hi te uso schpurtiskere mulatintschage: Kaj manuscha dukade schaj on, o dschivdscharipe afka sar ande lobdakere khelipeskere schtadiji fabijatim hi. Kekaj afka hi, mindig poar manuscha schofinen le, mindenfelitike pirotechniki pumenca te lel taj odola aun te dschivdscharel. Dschimeg o harengere odoj hi, butvar hijaba hi. Ham schtrofinipe schaj del, afka sar jek kherodipeskero fabot le schtadijonistar.

Dschi 3600 Euro schtrofinipe vaj dschi trin kurke astaripe fogosinen, te o tschatschiptscha le kartschi dipeskere kojendar, and likerde na ule. Te dukajiptscha mindig del, kaj ando Silvesteri te butvar pibe ando khelipe hi.

Papruschengero neviptschengero biknipe upro poschtito

Jek avro peripe, pedar savo o Alfred Schön phukal, hi, dschenendar save upro poschtito na oficijeli, butvar phureder ardiptscha papruschengere neviptschendar biknen taj dschenendar, save pasche phiren, loj kudulinen. Jek situacija, savi butvar ando foro te lakel hi.

Adaleske, oficijeli papruschengere neviptschengere biknaschtscha gejng terdschon, save o papruschengero nevipe „Augustin“ biknen. Butvar o manuscha loj len den vaj buteder potschin, so o papruschengero nevipe koschtalinel – ada sa konformi le tschatschipeha hi. Te kudulim schaj ol, ham tschak asaj dur, dschimeg avre manuscha aun astarde na on, afka o Alfred Schön.

Maschkar taj palo anglevakeripe le dschenen o schajipe sina, le grupnengere inschpekteriske Alfred Schön phutschajiptscha te terdscharel. But ada schajipe nucinde.

Ando arto kurko kesdinas le phukajpeha pedar o Internacijonali Romengero Di Betschistar taj andar o Burgenland.