Diskriminacija meg mindig esbe te lel hi
Afka sar o Burgenland-Roma, te on meg adi ande but thana le sako diveseskere dschivipestar ar granicalim on. I pisimaschkija taj anticiganismusiskeri ekspertkija, Roxy Lorraine Witt, andar i Germanija ali taj o kultureli mulatintschago jeke genipeha andar lakeri kenva „Rassismus.Macht.Vergessen.“ kesdintscha taj te i meg aun likerdi diskriminacija la flogoskera grupnatar upre sikatscha.
Nevi CD presentirim uli
O 1ti Sintijengero-kulturakero di ando cajchn la muschikatar terdscholahi, mint la muschika jek igen utscho terdschojipe andi kultura le Sintijendar hi. I ajgeni farajniskeri Newo Ziro-banda, pri nevi CD presentirintscha, upre savi butvar phure, tradicijoneli dschila la flogoskera grupnatar te lakel hi. O gitaraschi la formacijonatar o tschau le prindscharde Sinto jazz-muschikaschistar Zipflo Weinrich hi. O Buko Weinrich pre dadeha dugi cajt khetan upre mindenfelitike thana terdscholahi.
Radijo „Roma sam“ | 4to april 2022 | 20:50 orenge
Duach i sendung vodinel Susanne Horvath | Live Radio Burgenland
O dujto farajniskero schero Simon Bordt Lauster, khetan pra dajaha Natalie, i sako diveseskeri farajniskeri buti kerel. Ov le organisatorischi taj administrativi butjenge aun pe lel. Jek baro aunpaschlojipe le Simon Bordt Lausteriske hi, jek gondolipeskero arakipe le grobijenge odole flogoskere grupnakere dschenendar, save le bibastale tirinipeske maschkar i NS-cajt ar berscharde sina taj murdarde ule.
Muschika taj tschib barikane faktortscha hi
I Natalie Bordt Lauster ando bersch 2019, khetan pre tschavenca, o farajn Newo Ziro, le aunpaschlojipeha, te jek socijali aun naschipeskero than le Sintijenge te ol, save ande na latsche vaj bibastale dschivipeskere situacijai hi, kertscha. Ojs aguni socijali butschaschkija la Bordt o lek feder angle dime koji hi, le flogoskere grupnengere dschenenge te pomoschinel.
O uprelikeripe la muschikatar taj la tschibtschatar, la Sintizake barikano hi. Le jekoschne Sinti farajniha andi Austrija, i flogoskeri grupn jek bajderi joma andi pradipeskeri rik kerel taj i kultura le Sintijendar te le avre dschenenge dschivdon kerel.