I muschika vodinel le, sajt ov schov berscha phurano hi. O Tibor Barkoczy pro cilo ileto la muschikatar taj la muschikaha dschil. Akan o barikano jazziskero muschikaschi khetan pra tschajaha Melinda Stoika jek nevo album, savo ando baro falato ande Romani hi, kerel.
Ando kisetinipe le 80te berschendar but manuscha andar o aguno pujsto komunistischi reschim le Ungrikostar naschi gele. But dschene ande oja cajt ando vest naschi gele, kaj len feder dschivipe te ol. Jek adale migrantendar sina o adiveseskero jazziskero pijanisto Tibor Barkocy, savo pra familijaha andi Austrija alo.
Radijo „Roma sam“ | 6to decemberi 2021 | 20:50 orenge
Duach i sendung vodinel Susanne Horvath | Live Radio Burgenland
O Tibor Barkoczy ando 2to august 1952 ande Budapest upro them alo. Odoj tschorikan, ham sar ov phenel, igen bastalo ande jek Romengero-dschivipeskero than upre bartschino. Imar ando phuripe schov berschendar siklino o Barkoczy klavir te cidel. Ando bersch 1974 upri Franz Liszt Akademija ande Budapest o klaviriskero schtudijum kisetintscha. Ov imar ando terne berscha la muschikaha pre loj rodlahi. Kekaj o komunistischi reschim sina, ojs Romengero-muschikaschi ande oja cajt ando Ungriko, jek latscho dschivipe tut sina, phukal o Tibor.
1987 ando Ungriko jek politikakero irinipe dija taj but irintscha pe. Vaschoda o jazziskero muschikaschi pra familijaha andi Austrija naschi gelo, kaj leskere tschaven jek feder cukunft te ol. Poloke o Tibor andi Austrija pra muschikaha bajder schaj pe entviklintscha taj akor jazziskere bare dschenenca, afka sar o B.B. King, uso jazziskero festivalo ande Montreal cidlahi.
Jek baro aunpaschlojipe te mindig sina leske, pre tschavenge upro muschikakero drom te pomoschinel. Leskero tschau hangoskero indscheneri ando teateri taj uso bare lofkakere kheliptscha ande Mörbisch sina. Vasch jek pharo nasvalipe, angle valami efta berscha pro dschivipe naschatscha. Pra tschajaha Melinda Stoika o jazziskero pijanisto dschi adi muschika kerel. Khetan te le jazziskere dschilaschiha Louie Austen igen latschipe esbe line taj ando lek feder mojakere taj hoteltscha Betschiste cidnahi.
Taj te la bandaha DelaDap barikane latschiptscha esbe line, duj albumtscha ari dine taj duach i cili Europa roasinde. Le Tibor Barkoczyske leskeri identiteta igen barikani hi. Ande leskeri naphandli cajt, tschak muschika leske del. Pasche i muschika leskeri familija jek barikano falato leskere dschivipestar hi. O Tibor meg dur sasto te atschol kamla, kaj meg bajder pra muschikaha latschipe esbe te lel, taj kaj le manuschen pra muschikaha te loschanel kamla.