Saki naphandli minuta o Rauscher taj leskere dschene ando Ungriko hi, le dschenenge la flogoskera grupnatar le Romendar ande lengeri bibastali dschivipeskeri situacija te pomoschinel. Pasche but avre inicijativtscha, ada bersch papal o sako berschengero projekto „Christmas for Roma Kids“ del.
Pomoschago ande sake dschivipeskere situaciji
O Christian Rauscher ando 19to septemberi upro them alo. Ov dad trin bare tschavendar hi. Sajt imar valami 7 berscha leskere dschene taj ov le Romengere-familijenge ando gava Köröm, Girincs taj Kiscescs pomoschinen. Khetan le ordeniskere khetanipeha Steyler Missionare, save mindig odoj hi taj save ojs partnertscha upre tretinen, o Rauscher saki naphandli minuta odolenge, sar ov phenel „le lek tschorederenge le tschorendar“ aun pe lel.
Radijo „Roma sam“ | 29to novemberi 2021 | 20:50 orenge
Duach i sendung vodinel Susanne Horvath | Live Radio Burgenland
Use jek pharo fakeriskero peripe ando bersch 2014 o Christian Rauchser bojd pro ileto naschatschahi. Sajt oja cajt ov ojs upre dipe le dikel, le flogoskere grupnakere dschenenge ande lengere bibastale situaciji te pomoschinel. Enja, desch manuschendar ando gava Köröm, Girincs taj Kiscescs, dschene la flogoskera grupnatar le Romendar hi. O Romengere-dschivipeskere thana dur avral o foro paschlon taj tschak tschuli buti del. Tschak tschulen socijali butja hi taj odola nan latsche potschim. But khera le Romengere-familijendar na latsche hi taj paj vaj schtrom nan len.
O vert le manuschendar te soraljarel
Kaj len ando upre gende gava mindig tschulo habe sina, o Rauscher taj leskere kolegtscha gondi pumenge kerde taj afka o Romengero-barjakero projekto kerde. Uso koncepto flogoskere grupnakere dschene flaunclini, mogi taj pomoschago uschtiden, kaj ande pumare barja valaso aun te tschin taj te nucinen len. Le ciliha, o vert le manuschendar vasch lengeri produktiviteta te soraljarel taj mindenfelitiko habe le sako diveseske te kerel. Akan imar 200 khereskere barja ando trin gava del.
O tschave taj o terne le Christian Rauscheriske igen sorale upro vodschi paschlon, kaj on butvar nisaj perspektivtschenca upre bartschon. Kaj le tschaven poar schukar divesa te on, i organisacija Club of Roma o projekto „Jugendcamp“ kertscha. Valami 200 tschave andar trin gava, sako bersch use oda mulatintschago use hi.
Le Christianiske o khetanipe maschkar o manuscha igen barikano hi. Te le mindig o schajipe hi, diptscha meresch aun lel taj ov te igen meresch odola diptscha ar ulal, kaj o talalinipe le manuschenca taj o patschajipe ando manuscha, jek baro falato ande leskero dschivipe taj ande leskeri buti ojs schero la organisacijatar Club of Roma khelel.