„Frühe Hilfen“ pomoschinen khamne dschuvlenge taj familijenge tikne tschavenca dschi valami trin berscha, save ande pharikane dschivipeskere situaciji hi. O dipe naphandlo hi taj na koschtalinel nischta taj o familiji phenen, obste taj ande saj forma on o dipe te nucinel kamna. O projekto butvar odola familiji aun vakerel, save pumen ando sako diveseskero dschivipe phare keren, taj vaschoda, pumen na afka sar le pumenge kivaninen, upre pumare agjeni tschave te dikel dschanen, phenel o projektoskero schero Marion Weigl la organisacijatar Gesundheit Österreich GmbH ando vakeripe.
O „Frühen Hilfen“ te upre familiji use dschal, save ande bibastale dschivipeskere situaciji hi. Te Romengere-familiji schaj adale kojendar reste on taj pomoschago uso tschavengero parvaripe taj phutschajiptscha use aja tema schaj lenge pekan, phukal i Manuela Horvath, schero la Romengera-pastoralatar, savi pe le projektoskere prik bescharipeske le Romengere-familijenge ando Burgenland aun lel.
Radijo „Roma sam“ | 15to novemberi 2021 | 20:50 orenge
Duach i sendung vodinel Susanne Horvath | Live Radio Burgenland
Angloda, Romengere-familiji phutschle ule, obste on o dipe la organisacijatar „Frühen Hilfen“ aun lenahi. O forschinipeskero projekto ando telvakeripe le Romano Centroha, le betschitike flogoskere utsche ischkolenca taj Romenca taj Romnjenca, save pumare ajgeni schere hi, prik beschardo ulo. Sa khetan, 53 daja, dada taj babi taj papi andar i Romengeri grupn, 32 fochiskere dschene andar o sastipeskero- taj socijali than taj te 37 fochiskere badartscha taj badarkiji la tschavengera- taj ternengera sastipeskera kundejatar duach vakeriptscha, fokusiskere grupn taj online phutschajiptscha Betschiste taj ando Burgenland, phutschle ule. I Manuela Horvath phukal, saj resultatscha dschijakana uso Romengere-familiji lakel schaj ule.
O konkreti prik bescharipe „Frühen Hilfen“ ando sako diveseskero dschivipe hi afka, hot jek familijakeri vodaschkija le reste familijenca vakerel, so tschatschikan pekamlo ol. Oj pomoschinel uso kereipe lilendar taj informacija del pedar o arte jomi vaj diptscha, afka sar psichologischi berotinipe – idividujeli palo pekantschage le reste dschenendar. Adaj i familija ham mindig phenel, saj jomi kerde taj prik bescharde on. Igen barikano hi, hot jek patschajipe upre baunim ol, phukal o projektoskero schero Marion Weigl.
Aktujeli meg na del „Frühen Hilfen“ ando cile becirktscha la Austrijatar. O dipe ando arte berscha meg ar baunim te ol. Ando bersch 2020 sa khetan 6000 familiji berotim ule, adaj ham dschando nan, kitschi adale familijendar Roma taj Romnja sina. O lek buteder koji, save aun lim ule andar „Frühen Hilfen“ sina: pharipe, darja, medicinischi vaj socijali phariptscha, jek falindo socijali nec vaj pomoschago use tschatschipeskere berotiniptscha, afka i Weigl.
„Sensibilisirinipe adala temake pekamlo hi…“
O koncepto andar „Frühen Hilfen“ te le Romengere familijenge igen latscho ovlahi, afka i Weigl. Jek buti ham ando gondoskero sikadipe andrutnon i Romengeri-grupn pedar i tema „Frühe Hilfen“ del, mint but pedar o dipe na dschanen vaj na len oda aun. Ham te uso fochiskere dschene adala temake sensibilisirinipe pekamlo hi, mint Romengere-familiji migracijonakere kojaha soraleder phariptschenge ar bescharde hi taj odolenge o pomoschago andar „Frühen Hilfen“ pekamlo hi, phenel o projektoskero schero.
Te i Manuela Horvath ada afka dikel uso uso aunlipe le kojendar andar „Frühen Hilfen“, mint hot but pedar o dipe nischta na dschanen. Use poar familiji migracijonakere kojaha te tschibtschakere barijertscha del taj/vaj napatschajipe gejng o birovtschage vasch bibastale terdschijiptscha. Te jek dar anglo stigmatisirinipe vasch o aunlipe le pomoschagoskere kojendar, poar Roma taj Romnja tel likerel, o „Frühen Hilfen“ aun te lel, phenel i Horvath.
Upri website la organisacijatar Gesundheit Österreich GmbH meg avre informaciji uso projekto „Frühe Hilfen“ taj kaj odola aun bijatim on, del. Reste familiji mindig kontakto upre schaj len taj naphandlo taj anonimi informacija usi tema uschtiden.