La ungrikake, Romengere-vurclinenca igen barikano sina, i dschivipeskeri voja le Romnjendar taj Romendar ande lakere ajgeni pisime dschija papal te sikal. Ando 14to august 2021 la singer-songwriterkija i pativ sina, uso kesdipe le jubilejumiskere artschijipestar 100 berscha Burgenland upri dis Schlaining, i nevi kerdi burgenlanditiki thaneskeri himna telal o komponisto Christian Kolonovits ande pri dajakeri tschib ungriko, taj Romanes te dschilal. Usi „Tour le mindenfelitikostar“ le koncertiskere masteri Ferry Janoska o upredipe sina, o cile tschibtscha taj o muschikakere riktscha le flogoskere grupnendar upre jek hango tel te schtiminel. Ov la Melinda Stoika imar andar agune, khetane projekti prindscharel.
Betschi lakeri nevi hajmat uli
I Melinda Stoika ando 2to august 1977 ando foro Budapest upro them ali. Lakeri daj ojs pedagogkija butschalinlahi. Lakero dad o prindschardo jazz-pijanisto Tibor Barkoczy hi, savo lake i muschika imar ando tschavengere berscha, pascheder antscha. Imar ojs tikni tschaj baletiskero- taj klaviriskero siklipe uschtidija. Ande Budapest andi ischkola geli, paloda i modejakeri fochiskeri ischkola kher rodija. Andi flogoskeri ischkola lakera etnijaha ojs Romni konfrontirim li uli taj odoj oj o erschtivar la temaha rasismus taj diskriminacija gejng i flogoskeri grupn le Romendar, ando kontakto li peli. Vasch o aguno komunistischi reschim ando Ungriko, lakeri daj taj lakero dad andi Australija ar te roasinel kamnahi, on ham andi Austrija te terdschol atschine taj Betschiste pumari nevi hajmat lakle.
Radijo „Roma sam“ | 25to oktoberi 2021 | 20:50 orenge
Duach i sendung vodinel Susanne Horvath | Live Radio Burgenland
Muschika mindig la vodinel
Imar deschuschtar berschenca andi jazz-banda pre dadestar li sina, kaj oj pro talento sikatscha. Pra aguna bandaha on ando lek feder hoteltscha le forostar cidnahi. Ando kisetinipe le enjavardeschte berschendar i Melinda Stoika khetan le producentenca andar „Deep House Mafia“, saven oj ande jek seletoskeri bota te prindscharel siklini, lakeri erschti single „Let me know“ upro foro antscha. Paloda lakeri karijera te naschel kesdintscha. Le producentoha Stani Vana telal o bandakero anav „DelaDap“ jek muschikakero projekto schofintscha, use savo erschtivar ungriko Romengero-jazz le elektronischi beatenca khetan keverim ule. La bandaha „DelaDap“ i Melinda Stoika but jeriniptscha mulatintscha, afka sar jek latscho than telal o 100 thana ando austritike charts. Avre bare jeriniptscha mulatintscha i Melinda Stoika pre anavengere pajtaschiha Stojka, upre savo oj imar ojs tschaj upre diklahi.
Pasche lakere but muschikakere kheliptscha i Melinda Stoika meg te ojs DJane ando lek feder klubtscha Betschistar taj ojs hangoskeri-trenerkija, butschalinel. Ande lakeri naphandli cajt i barikani daj trin tschavendar meresch khere hi, kaj oj pre tschavenge habeskere kivaniptscha thal. Usi Melinda Stoika i familija ando maschkarutno punkto lakere dschivipestar terdschol. O khetanipe use lakero dad igen pajtaschalo hi. Oj, leha khetan, meg ada bersch jek album ari anel, upre savo oj Romanes presentirinla.