On demand
ORF TVthek | Servus Szia Zdravo Del tuha | 10to oktoberi
Tschibtschakero naschajipe taj o Burgenland Romani
Ande ada bersch, o Burgenland pri 100-berschengeri eksistenca mulatinel. Upri ajgeni historija taj upri ajgeni identiteta, ada bersch, pal diklo ol. O Burgenland te pre flogoskere grupn, save jek barikano falato adala identitetatar hi, ande but koncertscha taj artschijiptscha mulatinel. Amen ande adala donde beschariptscha o phutschajipe amenge terdschartscham, kaj o Burgenland Romani terdschol taj poar barikane protagonistenca use aja tema ando Burgenland, pedar vakertscham.
Flogoskero grupnakero koncerto | Tour der Vielfalt
O kunstakero simbosijum la inicijativatar la cajtakera kunstake „eu art network“ ando kesdipe le septemberistar imar o 21to var barikano interesi uschtidija. Ada bersch i trilogija „identiteta“ la temaha „Wer ist wir“ pro kisetinipe ando Cselley mlino ande Oslip lakel.
21 orenge i premijera le projektostar „Tour der Vielfalt“, kaj kinstlertscha le cile burgenlanditike flogoskere grupnendar pumar muschikakere stiltscha telal o koncertoskere moaster Ferri Janoska ande jek muschikakero jekoschno dikipe and te fojinel muken, kesdintscha.
Sentelinipe le gondolipeskere baristar Schtegate
Andi Berggasse Schtegate, andi rik le adiveseskere Roma jarkostar, ando 10to septemberi o sentelinipeskero mulatintschago le Romengere gondolipeskere baristar, tel likerdo ulo. Kerdi uli i gondolipeskeri inicijativa Schtegate le farajnistar Roma-Service taj la Romengera pastoraltar la diöcesejatar Tikni Martona. Ada erschti gondolipeskero than ando becirk Ujvara le opferenge la flogoskera grupnatar „Roma“, pal gondolinel upro but ledschime taj murdarde Romnja taj Roma maschkar o NS-reschim.