Jek grupn manuschendar pasche o mulo Romengero lirikeri Illija Jovanović taj avre aktivistscha sina, save 1991 o farajn Romano Centro kerde. I buti taj o pharipeskere punktscha sajt oja cajt irinde pumen. I Danijela Cicvaric, adiveseskero schero le farajnistar, angle 10 berscha maschkar lakero schtudijum jek praktikum kertscha taj sajt oja cajt uso Romano Centro atschini. Adi buteder Roma taj Romnija andi Austrija delahi, o Romano Cento butvar le aunpaschlojipenge taj pekantschagenge le Romendar taj Romnijendar migracijonakere kojaha aun pe lel, phenel i Danijela Cicvaric ando vakeripe.
Jek adale pharipeskere punktendar hi te die Romengeri ischkolakeri medijacijona. Sajt o bersch 2000 ischkolakere medijatorkiji Romane tschavenge taj ischkolenge pomoschinen taj odolen use lengero ischkolakero di vodinen. Jek buti, upre savi sako bersch diklo iste ol, hi o financirinipe adale projektistar. Mint sako bersch iste aunrodiptscha neve kerde on taj amen akor schoha na dschanas, te jek pomoschagoskero usephenipe al vaj na. Afka te i buti le ischkolakere medijatorkijendar fogosim hi, phenel i Cicvaric.
Radijo „Roma sam“ | 11to oktoberi 2021 | 20:50 orenge
Duach i sendung vodinel Susanne Horvath | Live Radio Burgenland
But farajntscha ande pumari buti fogosim pumen diken, kaj mindig sa le schtotlichi pomoschagostar tel hejnginel. Te ando Romano Centro ande ada than jek phari buti taj te jek fogosinipe la cukunftake diklo ol. I Danijela Cicvaric phenel, hot o prik dschivipe le farajnendar tschak duach jek umgondolipe andi politik schofim schaj ol. But berschengere pomoschagoskere loj iste del, kaj projekti pedar jek dugeder cajt kerde schaj on. O sako berschengero aunrodipe vasch pomoschagoskere loj mindig jek risiko peha anel, phenel i Danijela Cicvaric.
La cukunftake bajder planim ol, o dschuvlengero- taj tschajengero berotinipe aun te bijatinel taj te i Romengeri-ischkolakeri medijacijona upre te likerel. Adala barikane projekti hi, save upre likerde iste on, kekaj i pomoschagoskeri situacija brigaschni hi, afka i Cicvaric. Te o papruschengero nevipe le Romano Centrostar lake barikano upro vodschi paschlol. Akan te gondi del jek Romanes kurs aun te bijatinel taj afka la tschibtschake te pomoschinel. La Danijela Cicvaricake adala koji taj o upre likeripe le Romano Centrostar aunpaschlojiptscha hi, kaj te oj pe erscht la butjaha taj duach i buti ando farajn pra ajgeni historijaha taj pra identitetaha ojs Romni donde beschartscha, sar oj ando vakeripe phukal.
Jek baro gondo akan ando afka akarde Romengere strategiji taj o projekti, save adale pomoschagenca prik bescharde schaj on, beschardo ol. Upri dugi cajt diklo, iste ham jek putrinipe laklo ol, kaj i cukunft le Romano Centrostar taj avre barikane Romengere farajnendar, dim te ol.