Imar afka sar ando lejcti duj berscha terdschino o kinstlerengero simposijum ando Cselley mlino Oslip ando cajchn la identitetatar. Ada bersch adale kojaha jek trilogija kisetim ol. O phutschajipe, jek themeskero pradimo dikipe pedar jek regijonali vaj nacijonali identiteta te terdscharel, ando maschkarutno punkto le khetan peripestar le mindenfelitike kinstlerendar terdschol.
Tschaschtikan, 21 orenge o kesdipe usi „Tour le mindenfelitikostar“ sina, kaj kinstlertscha le cile burgenlanditike flogoskere grupnendar pumare muschikakere stiltscha telal o koncertoskero masteri Ferri Janoska ande jek barikano muschikakero sikajipe ande te fojinel muken. So schtar tschibtscha le Burgenlandistar fatretim sina, o horvacke rockertscha Bruji, o Josef Sári le ungrikendar, o austropoperi Max Schabl taj o fatretertscha le Romendar, i Melinda Stoika, o Ferri Janoska, o Martin Horvath taj o Leon Berger. Duach i rat vodintscha o prindschardo schauschpileri Christoph F. Krutzler.
Khetanipe te i ajgeni identiteta soraljarel
Radijo „Roma sam“ | 13ti septemberi 2021 | 20:50 orenge
Duach i sendung vodinel Susanne Horvath | Live Radio Burgenland
O khetanipe te i ajgeni identiteta soraljarel. Butvar usi muschikakeri banda barikano sina, hot sako muschikaschi te pri ajgeni identiteta ande te fojinel mukel, phenel o Martin Horvath. O keripe la bandatar ojs igen barikani joma andi flogoskeri grupnakeri buti ov dikel taj patschal, hot adale projekto te jek cukunft hi.
Le schipojkaschiske taj muschikakere meschteriske Leon Berger jek barikano terdschijipe sina, le Ferri Janoskaha te cidel. Leskero dschanipe, leskeri kompetenca taj te o karekteri le Romengere muschikaschistar barikane hi, phenel o Leon Berger.
Pomoschago la politikatar pekamlo hi
Kaj asaj projekto kerdo schaj ol, mindig pomoschago la politikatar pekamlo hi. O Josef Schmidt le Burgenland patijarel, kaj o khetan butschalinipe le flogoskere grupnakere fatreterendar taj le politischi organendar igen latscho hi. Igen latsche tecinel leske o khetan butschalinipe le flogoskere grupnendar. I „Tour le mindenfelitikostar“ barikano le le Burgenland pre mindenfelitike etnijenca papal sikal, afka o Josef Schmidt.
Odola dschene, save ada barikano muschikakero mulatintschago te terdschil taj o mindenfelitike muschikakere stiltscha le burgenlanditike flogoskere grupnendar te schunel kamna, dschanen ada ando 9to oktoberi andi KUGA Großwarasdorf taj ando 16to oktoberi ando OHO Erbate.