„Servus Szia Zdravo Del tuha“ | Programo 8to august | ORF 2 Burgenland

On demand

ORF TVthek | „Servus Szia Zdravo Del tuha“ | 8to august 2021

Artschijipe „Manuš heißt Mensch“

Akan andi kunstakeri hala Betschi o artschijipe „Manuš heißt Mensch“ te dikel hi. Palal terdschol o Averklub Collective, jek khetanipe kinstlerendar taj kinstlerkijendar taj aktivistendar taj aktivistkijendar andar i Tschechija. O artschijipe le temenca tschoripe, identiteta, dschivipeskere rejalitetscha taj emancipacijona le Romendar taj Romnijendar ango palutno koja le socijalismusistar donde pe bescharel. Ando koja la eksposicijonatar te workshops dija, save pumen te adale temenca donde bescharde. O dschene andar „Servus Szia Zdravo Del tuha“ uso projektoskero angle terdscharipe andi kunstakeri hala Betschi ando juni use sina.

Sentelinipe le holocaustiskere gondolipeskere thanestar | Neusiedl am See

Ando juni ande Neusiedl am See o holocaustiskero gondolipeskero than ando khangerakero park sentelim ulo. O gondolipeskero than upro opfertscha le dschidovkijendar taj dschidovtschendar, la eutanasijatar taj le Romendar taj Romnijendar andar Neusiedl am See pal gondolinel. O gondolipeskero than jek than le palgondolipeske upro bibastale koji le nacijonalsocijalismusistar te ol taj o terdschijipe le opferendar te sikal.

„Gondolipe“ upro talalinipeskero than | Langental

Ande Langental, jek gaveskero falato la gemajndejatar Großwarasdorf, akan jek talalinipeskero than kerdo ol, savo upro le nacijonalsocijalistendar deportirime taj murdarde dschene pal te gondolinel. O lek buteder opfertscha andar i flogoskeri grupn le Romendar sina. Aktujeli forschiniptscha phenen, hot anglo dujto themeskero haburi 280 Roma andi gemajnde dschivnahi. O lek buteder lendar ande Langental. Adi ando gav bojd nisaj dschene la flogoskera grupnatar del.

Muschikaschi Leon Berger | Saksofonisto taj schipojkaschi ando sikajipe

Ando 90te berscha iste but manuscha vascho Balkan haburi andar pumari hajmat Eks-Jugoslavija naschi gele. Tel lende te but Roma. Jek adale flogoskere grupnakere dschenendar hi o Leon Berger. O muschikaschi andar i Serbija, ando Burgenland jek nevi hajmat lakla. Adi hi ov privati muschikakero meschteri taj o instrumentscha saksofon taj schipojka sikal.

Online teateri „Bibi Sara Kali“

„Bibi Sara Kali“, afka butschol o nevo teateriskero falato la schauschpilerkijatar taj pisimaschkijatar Simonida Selimović. Palo mulipe la dajatar iste trin phenja ande pumari phuri hajmat Serbija pal roasinen taj odoj bojd pobisterde tradicijenca konfrontirim le on. Pasche, iste on pumen te la ajgeni identitetaha donde bescharen. O falato pri premijera ando juni ando Admiral kino Betschiste mulatintscha. Odoj o dschene andar „Servus Szia Zdravo Del tuha“ la Simonida Selimovićaha resle pumen, pedar lakeri nevi produkcijona te vakerel.