Ausstellung „Manuš heißt Mensch“
ORF
ORF
KULTURA | ROMA SAM

Artschijipe „Manuš heißt Mensch“

Akan andi kunstakeri hala Betschi o artschijipe „Manuš heißt Mensch“ te dikel hi. Palal terschol o Averklub Collective. O artschijipe le temenca sar tschoripeha, identitetaha, dschivipeskere rejalitetenca taj emancipacijonenca le Romendar taj Romnjendar aglo koja le socijalimusistar done pe bescharel. Ando keripe la eksposicijonatar te workshops tel likerde ule.

„Manuš heißt Mensch“, upri kenva le tschechoslovakischi politikeristar taj Romestar Daniel Vincent pal dschal, savi 1986 ari ali. Oj la politikaha la integracijatar le Romendar taj Romnjendar andi komunistischi Tschechoslovakija donde pe bescharel. Jek tema, savi pe te papal ando artschijipe sikal, phenel i kunstakeri famitlerkija la kunstakera halatar Betschi, Andrea Hubin.

Ausstellung „Manuš heißt Mensch“
ORF
Artschijipe „Manuš heißt Mensch“

O Averklub Collektive jek khetan phandlipe kinstlerendar taj kinstlerkijendar mindenfelitike kojendar taj kontekstendar hi. Pasche o kulturakere keraschtscha taj aktivistscha genen o dschene jeka seletoskera bauninipeskera sidlungatar ande Chanov, Tschechija uso kinstlerengero khetanipe. Ande Chanov angle poar berscha te o Averklub-kulturakero centrum kerdo ulo, savo le cile dschenenge la sidlungatar prado terdschol. Vasch manuscha dschal, save pumen le kulturakere famitlinipeske aun len, afka i Hubin.

Andrea Hubin
ORF
Andrea Hubin | Kunstakeri famintlerkija kunstakeri hala Betschi

Jek phutschajipe, savo mindig del hi, obste asaj koja sar „Romengeri-kunst“ del taj te he, sar oja te definirinel hi. O Averklub Collective adale kojstar ar dschal, hot oda, so adi ojs „kunst le Romendar taj Romnjendar“ akardo ol, na del taj schoha na dija. Jek komplicirti kategorija hi, savi ando historischi koji la maschkarutna Europatar na kerdi schaj uli. O artschijipe gejng jek strategija la inklusijonatar pe irinel, mint oja o dikipe upro socijali politischi koji na sikavlahi, soske jek kunst na tschak jek upre lipe ando kunstakero kher esbe lija taj soske ojs tschak afka na eksistirintscha. Duach ada heftscha del, save te jek historija phukan, phenel i kunstakeri famitlerkija.

Radijo „Roma sam“ | 19to juli 2021 | 20:50 orenge

Duach i sendung vodinel Susanne Horvath | Live Radio Burgenland

Adi o muaninipe del, hot kunst ardschuminipe la identitetatar hi. O phutschajipe adaj hi, sar identiteta definirim ol, obste pedar etnischi koji, obste pedar murscha vaj dschuvla, vaj pedar butjakere thana, o akaripe pharo ande te granicalinel hi. I kunst ham jek dikipeskero than hi, kompleksi modeltscha, afka sar khetan phandliptscha taj asicijontscha aun te del, kaj vaschoda gondolipeskere modeltscha bejg jeka tel pisima formelatar, identiteta te schofinel, phenel i Andrea Hubin.

Ausstellung „Manuš heißt Mensch“
ORF
Ausstellung „Manuš heißt Mensch“

Ando keripe le artschijipestar ando kesdipe dschi ando maschkaripe le julistar schov workshops use mindenfelitike temi telal o anav „Ojas amen rejalistischi“ dija. Mindenfelitike ekspertscha taj ekspertkiji pumaro input dine – i Melinda Tamás, anti-rasismus-trenerkija khetan la Andrea Hubinaha o koncepto entviklintscha.

Ando workshops o phutschajipe del, saj barikanipe le objekti le artschijipestar hi taj te on te jek historija te phukal dschanen. On jeka „bijografijaha le kojendar“ pal jek gondo le pisimaschistar Sergej Tretjakow palal dschan, phenel i Tamás.

Melinda Tamás und Andrea Hubin
ORF
Melinda Tamás taj Andrea Hubin

O artschijipe „Manuš heißt Mensch“ na phukal. Ov phutschel taj upre valaso sikal, savo mindschart aun astardo naschtig ol. Ov ham jek than uso donde bescharipe taj usi diskusija schofinel. I Melinda Tamás phenel, hot o artschijipe o phutschajipe upre tschidel, sar i historija dikli schaj ol, te aja historija dija taj te aja historija na dija, soske la na dija.

Melinda Tamás
ORF
Melinda Tamás | Anti-Rassismus-Trainerin

O pisimaschi taj aktivisto, Samuel Mago jek le anglevakeraschendar uso workshops hi. Ov jek input usi tema „emancipacijona te organisirinel“ del. Leske o artschijipe te jek than hi, savo le manuschen pascheder schaj anel. Jek vodschikano aunpaschlojipe hi, thana andi Austrija taj andi Europa le lakel, kaj i kultura le Romendar taj Romnjendar jek than taj afka te dikel hi, phenel o pisimaschi.

Samuel Mago
ORF
Samuel Mago | Pisimaschi taj aktivisto

Taha, ando 20to juli meg o schajipe del, o lejcti workshop la Gilda-Nancy Horvathaha kher te rodel: Vasch i tema esbe lipe Romendar taj Romnjendar taj Sintijendar taj Sintezzendar dschala. I Gilda-Nancy Horvath pal jek vakeripe upro cile phutschajiptscha pasche Roma taj Romnja taj Sinti taj Sintizze ando keripe jeke loke dialogostar le dschenenca pedar dschanipe/phukajiptscha taj projekcijontscha, palvakeripe del.

O artschijipe „Manuš heißt Mensch“ meg dschi uso 5to septemberi andi kunstakeri hala Betschi, aun diklo schaj ol.