Radijo „Roma sam“ | 31to maj 2021 | 20:50 orenge
Duach i sendung vodinel Susanne Horvath | Live Radio Burgenland
Gärtner-Horvath | Le ar te dschuminel, hot ov falinel amenge, vaschoda o alava amenge falinen
Imar sajt o 1980te berscha, o Erich Schneller, le akor kerde farajniske Roma Erbate, pasche terdscholahi. „Ov amenge jek barikano dromeskero vodaschi sina, jek baro dscheno taj jek idol odoleske, jek dschivipe nisaj diskriminacijaha te dschil. Le ar te dschuminel, hot ov falinel amenge, vaschoda o alava amenge falinen“, phenel o Emmerich Gärtner-Horvath, anglebeschaschi le flogoskere grupnakere bajrotistar le Romendar.
O Erich Schneller andi foroskeri gemajnde Simeha | Veliki Petrštof | Nagyszentmihály upro them alo, kaj ov te upre bartschino. Pal i matura upro gimnasijum Uprutni Schica, Betschiste publicistik taj politikakeri visenschoft schtudirintscha. 1979 pri buti ando ORF-thaneskero schtudijo Burgenland kesdintscha, kaj ov ojs reporteri radijoskere- taj televisakere sendungenge, redakteri taj keraschi televisakere produkcijonendar, prindschardo sina.
Baranyai | „Jeke duge berschengere pajtaschi naschatscham“
O Johann Baranyai, aguno schero le farajnistar Roma Erbate, pal gondolinel upro kesdiptscha le erschti micinipendar le Erich Schnelleriha, kada ando maschkaripe le 1980te berschendar le Romenge jek lokalengero fabot ar dim ulo. Diskriminacija la flogoskera grupnatar bojd sako di usi debata terscholahi. „Amen terne samahi taj na dschanahi, so gejng ada koja schaj keras, afka o Erich Schneller le terne Romenge o drom sikatscha“, phukal o Johann Baranyai.
O Schneller lenca khetan, gejng adala diskriminacijakere periptscha, ande pe beschartscha. Ov mindig upre diklahi, jek putrinipe te lakel, jek drom uso mirno khetanipe. Ov jek bari hef pal mukel, „amen jeke duge berschengere pajtaschi naschatscham“, afka o Johann Baranyai.