I EU pro patschanipe naschal, vasch pro anglegejipe, phenel o nimtschko selenengero rot Romeo Franz. Te o christ demokrat Peter Pollk mangel konkreti haundliniptscha. I SPD-akeri rotkija Delara Burkhardt phenel, akan tschatschiptschengere phandliptscha konsevencenca pekamle on, te o migliderengere schtotscha pumare ciltscha na resle.
I EU akeri komisarkija le glajchterdschavipeske, Helena Dalli, primintscha ando parlamento, o duripeskero cil hi, i sociökonomischi hef maschkar o Roma taj avre manuscha andi EU use te tschapinel. Ando oktoberi sina la komisijona jek enja deschberschengeri strategija le pomoschagoske le Romenge andi EU, savi upro drom antscha. O keriptscha hi o glajchterdschavipe, inklusijona, usekerinipe, sikadipe, buti, sastipe taj atschipe dschi 2030.
Dschi desch vaj deschuduj milijontscha Roma taj Sinti o lek bareder ethnnischi tschulipe andi Europa hi. Valami schov milijontscha Roma andi EU, lek buteder andi sudost Europa, butvar bibastala socijali taj virtschoftlichi kojake ar beschardi hi. On butvar diskriminirim taj argranicalinim on, len igen tschule use gejipe uso sikadipe ta buti hi.