Pedar ari del jek but tschibtschakero livestream upri website le Mauthausen Komitejistar taj te o ORF III sikal o gondolipeskero mulatintschago.
Mauthausen taj o 49 pasche paschlime logertscha
Maschkar 1938 dschi 1945 ande Mauthausen taj leskere 49 pasche paschlime logertscha valami 200.000 manuscha and tschapim sina, bojd epasch lendar murdarde ule vaj vasch o bibastale situaciji mule. Sajto o haburiskero kisetinipe le putrinipeske le logeristar ando 7to maj duach o US-nimci, sako bersch gondolim ol. Uso lek bareder logeriskero putrinipeskero mulatintschago but eseri dschene andar o cilo them an, tel lendar te imar igen phure prik dschivde le murdaripeskere logeristar.
ORF III o internacijonali gondolipeskero mulatintschago 2021 live usar 11.00 orenge sikal taj usar 10.15 orenge te i ökumenischi mischa andar o gondolipeskero than Mauthausen.
Keresuji schaj tel paschlarde on
Ando lejcti bersch vasch i pandemija o mulatintschago ando gondolipeskero than naschtig kerdo ulo taj vaschoda tschak virtujeli lo tel likerdo ulo. Ada bersch schaj te keresuji tel paschlarde on, kekaj o gendo le delagacijendar vasch o Corona-tschatschiptscha, and granicalim hi. O cile avre schaj o mulatintschage, save telal i berscheskeri tema „Vernichtete Vielfalt“ terdschona, pedar o livestream diken.
Individujeli mirno gondolipe
O gondolipeskero phiripe kesdinel 11.00 orenge le virtujeli genipeha le „Mauthauseniskere-armaja tschijipestar“ le ternendar ande buteder tschiptscha. O cilo gondolipeskero phiripe la Mercedes Echereratar taj la Konstanze Breitebneratar moderirim ol, o Willi Mernyi, anglebeschaschi ando Mauthausen Komitee Österreich taj o generaliskero sekretari Andreas Baumgartner-Danilović andar o Comité International de Mauthausen, uso virtujeli gondolipe vakerna. Organisirimo mulatintschago uso nacijonali gondolipeskere thana vasch Corona naschtig kerde on, jek individujeli mirno gondolipe ham schaj kerdo ol. Upre vrischtschando ol, bokreti, bara, t.a. tumenca te lel. Imar usar o 4to dschi uso 6to maj upro opfertscha andar Mauthausen la videjoskera inschtalacijonaha „#eachnamematters“ gondolim ulo: O Mauthausen Memorial ando khetanipe la Ars Electronicaha o anava le opferendar upro falo le agune logeristar projicirintscha.
Pobisterdo logeri Gusen
Kada o aguno logeri Mauthausen 1947 la republikake Austrija le upre dipeha prik dim ulo, jek gondolipeskero than te kerel, o logeri Gusen, savo poarvar muguli bareder sina sar o logeri Mauthausen taj kaj o murdaripeskero gendo igen utscho sina, mindig buteder pobisterdo ulo. Uso putrinipe valami 20.000 dschene and tschapim sina, 35.000 mansuche ande poar berscha murdarde ule. O umgejipe le arejaliha a.t. andi Polnija, kaj igen but mule dija, na latsche kojaske sorgintscha. Angle poar divesa phentscha i bundakeri regiring, hot i republika centrali falati le agune logeristar Gusen andi Uprutni Austrija, kintscha.