O burgenlanditiko ungriko kulturakero farajn (BUKV), o farajn Roma-Service taj o horvacko kulturakero farajn (HKD) ando khetanipe la foroskera gemajndaha Erba o gondo, savo imar dur del, prik te bescharel kamna, phenel i Iris Zsoter, dugo berschengero schero taj adi o dujto schero le ungrike kulturakere farajnistar.
Gondo papal upre lim ulo
O Emmerich Gärtner Horvath, anglebeschaschi la flogoskera grupnatar le Romendar phukal, sar papal use ada gondo alo taj so i khetani buti le flogoskere grupnendar te sorjarel dschanel. Imar sajt deschberschengero khetane projekti del. O khetan butschalinipe pedar o berscha mindig soraleder ulo taj use jek khetani flogoskeri grupnakeri kultura pe entviklintscha, afka o Gärtner-Horvath.
Khetano artschijipe planim hi
Ando cajchn le jubilejumistar 100 berscha Burgenland, te jek khetano roasinipeskero artschijipe planim hi. Vasch i meg mindig aun likerdi Corona-pandemija ham naschtig o cajtakero punkto adale artschijipestar phendo ol. O flogoskere grupnakere fatretertscha, telal lende o Martin Kerstinger, sekretari le horvacke kulturakere farajnistar upre feder situaciji gondolinen, kaj o khetane projekti ando tschatschipe prik bescharde schaj on.
Kaj i bundakeri regirung taj o bundakero kancleriskero birovtschago meg te avre flogoskere grupnakere pomoschagoskere loj ari te del kamna, o fatretertscha le flogoskere grupnendar taj i foroskeri gemajnde Erba, jek aunrodipe adale projektoske kerde. Te EU-jakere subvencijontscha adaj ando phutschajipe avnahi.
Radio „Roma sam“ | 5to juli 2021 | 20:50 orenge
Duach i sendung vodinel Susanne Horvath | Live Radio Burgenland
Meg tel uschardo iste ol
Dschijakana meg nischta dschando hi, obste o bundakero kancleriskero birovtschago uso koncipirinipe taj planinipe financirinel. Taj te uso farajntscha meg buteder koji nan jek: Kitschi loj pekamle hi? Ko planinla? Sar o organisatorischi koji ar te diken? But phutschajiptscha meg nan jek. Ham use jek koja, o cile fatretertscha dschanen, hot o foro Erba vasch pro multikultureli dschivipe taj leskere flogoskere grupno, o tschatschikano than hi.
Le bauninipeha le flogoskere grupnakere kherestar jek barikano koja schofim schaj ol, savo o angle sikajipe le forostar Erba taj te le cile Burgenlandistar akor hi. O latscho khetano dschivipe sikal taj te butjakere thana papal delahi. Ham dschimeg ada rejaliteta hi, but buti meg del. Sar te ande but avre temi, adaj i politik ham phutschli hi, phenel o anglebeschaschi le Romendar, Emmerich Gärtner-Horvath.