Hans-Jürgen Horvath
Elke Groen/Golden Girls Fillm
Elke Groen/Golden Girls Fillm
ROMA SAM | LOCKDOWN

Pandemija | O mojakero Hans-Jürgen Horvath upro seleno udud uscharel

Imar bojd jek bersch hi, kaj amen i Corona pandemija sorale andi diha likerel. O mojakere taj o tourismus adale kojendar virtschoftlichi igen phare resle ule. Use aja tema, o mojakero taj burgenlanditiko flogoskero grupnakero dscheno, Hans-Jürgen Horvath, kherodaschi ande amari sendung hi.

Sajt 27 berscha o Hans-Jürgen Horvath akan imar i diskoteka Halleluja Pinkafate kerel. Ov amare reporteriha Adolf Gussak pedar i aktujeli situacija vakerel.

Butvar i virtschoftlichi situacija, hot upral jek di upro kija, nisaj loj naschtig buter rodes man taj pre partneri phare resla.

O pomotschage la regirungatar nan mindig afka, sar phendo ol. O birokratischi butja taj te o duge urscharipeskere cajtscha upro finacijeli pomoschago, jekeske but ori anel, ande save te sol na dschanes, phenel o Hans-Jürgen Horvath.

Hans Jürgen Horvath
Privat
Hans-Jürgen Horvath

Radijo „Roma sam“ | 8to merc 2021 | 20:50 orenge

Live Radijo Burgenland

O Hans-Jürgen 1971 upro them alo. Ov ande jek bari familija, 5 phenjenca taj phralenca, andi Tikni Boslina upre bartschino. Leskero dad Betschiste bauninipeskero butschatschi sina, leskeri daj upro kher taj upro tschave diklahi. Ojs Rom nana mindig loke, ande asaj tikno gav sar andi Tikni Boslina, phenel o adiveseskero mojakero.

Kekaj ov sa kertsch taj sik dikla, kaj jek arsiklipeskero than te lakel, vasch leskero telschtaminipe, leskero cipakero feschto taj vasch leskeri etnija, le nisaj schajipe le nana, jek arsiklipe te kesdinel. Afka ov andi bundakeri handlinipeskeri ischkola Erba gelo taj kisetintscha la. I diskriminacija, savi ov mindig esbe te lel uschtidlahi use oda vodintscha, hot ov pe pra flogoskera grupnake sorale kertscha taj jek le dschenendar sina, save o erschti Romengero farajn kerde.

Vorstand Verein Roma
Verein Roma
balutnon: Gisela Horvath, Emmerich Gärtner-Horvath , Hans-Jürgen Horvath, Alfred Horvath, Rudolf Sarközi taj Susanne Baranyai uso khetan bescharipe ando mojakero Neubauer Erbate

Kada ov ando 90te bersch pro mojakero pratscha, but diskriminacijaha le te kejmpfinel sina. Pre loke, use gejipeskere taj loschande dschivipeskere upre tretinipeha, dschantscha ov but manuschendar o teldikiptscha, save odolen gejng i flogoskeri grupn le Romendar sina, te lel taj afka te sikatscha lenge, hot te tschuliptscha manuscha sar o avre hi.

Vascho kamipe usi muschika taj vasch pri naphandlipeskeri buti ojs DJ, o Hans-Jürgen ande oja cajt, afka use pri adiveseskeri buti alo.

Adi schaj phenav, hot mri kamli buti laklom, afka o mojakero, savo ov le cile vodschiha hi.

Disco Hallelujah
Privat

Le Hans-Jürgen Horvath taj leskere partneri te jek recepto hi, sar ande phare cajtscha schofindo lo schaj ol, duge upre jek than te atschol, kekaj neve tschatschiptscha sar o thuvtschalengero tschatschipe vaj o tschatschipe la registririnipeskera kasake, kerde ule.

Hans Jürgen Horvath und sein Partner
Privat
Hans-Jürgen Horvath (balutnon) taj leskero partneri

Dugeder sar schtar masektscha i diskoteka „Halleluja“ vascho Coronakere anglediptscha imar use tschapim hi. Andi cajt le Lockdownistar leskere tschaveskere tschauiske uso „Distance Learning“ pomoschinel.

Ov gondolinel, hot ov pro mojakero bojd papal upre te tschapinel dschanel taj ov te sake koji aun lelahi, kaj pri buti papal schaj kerlahi. Akan o Hans-Jürgen tschak upro seleno udud la regiriungatar uscharel, mint ov imar ando kesdipeskere heftscha terdschol, kaj pre kherodaschtschen papal schukar schaj akarel.