Ferry Janoska
Lisa Halvax
Lisa Halvax
ROMA SAM

Ferry Janoska pedar o kinstlerengero dschivipe andi Corona cajt

O lejcti bersch but le dschenendar mangla. Butvar le dschenenge, saven ajgeni firma hi taj le kinstlerenge, sina taj meg mindig loko nan, lengera butjake papal te dschal, mint o Coronakere anglediptscha meg mindig sorale o keripe le kulturakere kherendar and karikasinel. Amen le komponistoha taj muschikaschiha Ferry Janoskak pedar vakertscham, sar ov ojs kinstleri o lejcti bersch terdschivtscha.

Ferry Janoska
ORF
Ferry Janoska

„2020 na pobistera asaj sik“

O kalenderi le kinstleristar Ferry Janoska ando bersch 2020 latsche pherdo ujahi. Ham i Corona pandemija taj o khetan phandle anglediptscha, save butvar le kunstakere- taj kulturakere than sorale reste, ande, hot le Janoska akan buteder „naphandli cajt“ hi, sar ov ada kamla. Planim sina jek oper le betschitike dschilaschengere tschavenca taj jek etnofestivalo ando Burgenland – so duj koji pal ispidim ule, mint meg mindig dschando nan, kada o kulturakere khera papal pran taj te naschel kesdinen. Palo barikano bersch angloda, o Janoska uso kesdipe pedar aja naphandli cajt loschantscha pe, savi leske o schajipe dija, pal ada dschumipe, eknaj diha te cidel. Kada akor ham te dikel sina, hot bojd o cile projekti na kerde schaj on, o lokipe ande jek briga, pedar i butjakeri cukunft, prik tschalatscha. „Jek bersch sina, savo me na pobistera asaj sik “, phenel o kinstleri Ferry Janoska.

Radijo „Roma sam“ | 22to feberi 2021 | 20:50 orenge

Live Radijo Burgenland

Na tschak uso Ferry Janoska o bersch pre jomi pal mukla. I cili kunstakeri- taj kulturakeri scena telal o koji la pandemijatar tirinen, save dschijakan meg nan te dikel. O museumtscha aktujeli akan papal pran, kada ham papal koncertscha dela, iste tel uschardo ol. O Ferry Janoska gondolinel, hot etablirime kinstlertscha schaj le schofinen, te Corona na buter amaro sako diveseskero dschivipe dominirintscha, pumari karijera bajder te kerel, mint lengero publikum atschel lenge. Angle jek bibastalo koja, afka o Janoska, terdschon on afka naprindscharde kinstlertscha, ham te adaj schajiptscha lo dikel, mint use jek nevi rik la krejativitetatar schaj al. Lek barikaneder hi ham o sastipe taj upre oda mindig diklo iste ol, afka o kinstleri.

„Mange o publikum falinel“

La kunst igen baro and fojinipe upro vodschi le manuschendar hi, savestar akan igen but manglo ol. But telal o Lockdown taj telal o na dimo socijali kontaktscha tirinen. I muschika adaj but schaj kerel taj jek positivi and fojinipe upro hango le manuschendar schaj lel, afka o muschikaschi Janoska. Jek schajipe, save but kinstlertscha ando Lockdown vöinde, pumaro publikum te resel, hi o Live-Stream. Te i panonischi boschitschani gala andi dis Esterhazy, savengero kinstleri schero o Janoska hi, oni publikum kerdi uli taj ando internet te dikel taj te schunel li sina. Le muschikaschiske, savo pre bandonejoniha use sina, jek na prindschardo terdschijipe, mint leske o use schunaschkiiji taj use schunaschtscha ando baro kher falinahi. Kekaj afka sina, o Janoska o Steam le koncertostar ojs latscho schajipe dikel, le manuschenge khere eknaj trestinipe te del taj len upre avre gondi te anel, kekaj ov o digitali putrinipe meg na ojs latscho keripe dikel.

Ferry Janoska
ORF
Ferry Janoska

O lejcti besch o kinstleri ojs naphandli cajt leskera butjatar dikla, butvar te i motivacijona falinlahi, sar ov phenel, kaj bojd o cile projekti tel phende ule. Ov ham optimistischi andi cukunft dikel, mint imar poar aun phutschajiptscha del taj te koji adale berscheske imar planim hi – afka sar jek projekto le Peter Wagneriha, saveha le imar jek dugo kinstlerischi pajtaschtschago khetan phandel, taj koncertscha la pandorferakera tamburikakera grupnaha Ivan Vukovic taj te papal i sako berschengeri boschitschani gala andi dis Esterhazy kerdi ol, savake ada bersch, o Janoska imar barikane gondi kerel. So, oda ham meg na kamla ov te phukal. Ov ham dschanel, te papal sa kesdintscha, taj oda ov buter te uscharel na dschanel, te i motivacijona papal pal al taj le kinstleriskere keripeske nischt ando drom na terschola.

Der Fluss
Peter Wagner
Ferry Janoska, Der Fluss

Lek barikaneder hi akan na upre te del

Le terne kinstlerenge, save pumari karijera erscht kesdinde taj save la pandemijatar igen sorale resle ule, le Janoska meg rotinipeskere alava hi, sar on pedar aja cajt schaj pernahi. Mint te ov dschanel so butschol, asaj kojenca te dschil, otscha te perel papal upre te terdschol taj oda, na sajt Corona del. Lek barikaneder hi, afka o Janoska, i familija, savi upre tute gondolinel, kekaj oda tu buter na keres. Taj: Sune te dikel taj odola sune schoha na upre te del. Te adaj bajder kertschan taj na i vasteskeri plasta bejg tschiden, akor te duach aja cajt schaj le schofinen, afka o kinstleri.

Na dur pal, o Ferry Janoska pro 62to bersch mulatintscha. Ov upre jek duge berschengeri taj jerimi karijera pal schaj dikel, savi ham meg na kisetim hi taj savi te duach Corona na asaj loke ando resdajipe al. Le kunstakere- taj kulturakere themeske tschak o tel uscharipe atschol, so i cukunft anel, dschidokle butschol, sar le o Ferry Janoska ando vakeripe phenel, „tel te uscharel taj na upre te del“.