Wolfgang Pucher raschaj le tschorenge

Andi aktujeli sendung o raschaj Wolfgang Pucher kherodaschi hi. O Pucher sajt 1973 raschaj andi gerecitiki gemajndi St. Vinzenz taj keraschi le „VinziWerkender Österreich“ hi. Ojs „Lazarist“ leske imar mindig vodschikan sina, hot ov peske odolenge aun lel, savenge o pomoschago lek buteder pekamlo ol. 1996 o erschtivar ando kontakto dschenenca la flogoskera grupnater le Romendar pelo, kada ov jeke guduschi le slovakischi gavestar Hostice Gereciste te prindscharel siklija taj afka te upro problemtscha le Romendar upre pelo. Hostice jek tikni gemajndi andi suditiki maschkarutni Slovakija valami eseri dschenenca hi.

Guduschta leske o vodschi prade

O tschoripe taj o dschivipe, ande save o Roma ande pumare gava dschivnahi, len use ledschija, kaj jek baro falato lendar pumare terdschivipeskere loj Gerciste gudulinipeha rodnahi. But lendar ando verdi sovnahi vaj dschevendeste ando pradipeskere khulaltscha, kaj tato sina. I briga adale manuschendar micintscha le Pucher, adale dschenenge te pomoschinel.

Bari briga taj tschoripe

Kaj jek sojipeskero than andi Austrija i situacija le Romendar ande Hostice na irinel, dschanel o raschaj. Ov journalistenca taj dolmetscherenca upro drom pe kertscha, kaj i situacija le Romendar andi Slovkija dikli te ol. Aja briga taj tschoripe, savi o raschaj odoj dikla, naschtig tuke angle terdschares.

But socijalengere projektenca sar o projekto „Vinzipasta“, duach lojengere diptscha andar i Austrija taj o khetan butschalinipe le biroha andar Hostice, i situacija le Romendar ando tikno gav feder ulo, phukal o Pucher.

Sajt 1991 „Vinzibus“ dromeske le pomoschinipeske hi

O Wolfgang Pucher ando 31. merc 1939 ande Hausmannstätten mer Gereciste upro them alo. Imar igen frija, pomoschagoha leskera dajaha ov dschantscha, hot raschaj lo te ol kamla. Pali matura o Pucher uso „Lazaristen Orden“ gelo, odoj raschaj lo ulo taj 1973 andi „Pfarre St. Vinzenz“ lo akardo ulo. 1991 o Pucher la „Jugend-Vinzigemeinschaft“ aha le projektiha „Vinzibus“ kesdintscha.

Jeka milijonaha dotirti „Essl Sozialpreis“-iha

Adi den o „Vinziwerke“ andi Austrija sako di 450 dschenenge jek sojipeskero than taj fasorginen 1.400 dschenen habeha taj pibeha. O Pucher pra butjake but diptscha uschtidija, sar o rupuno „Ehrenzeichen für Verdienste“ la rebuplikatar Austrija, vaj le jeka milijonaha dotirti „Essl Sozialpreis“-iha. O loj o raschaj pre tschorengere projektenge lija. O Pucher kekaj atschi patijariptscha uschtidija leskero manuschanipe leske atschino.

O raschaj te odoloseke feranvoatlich sina, kaj o gudulinipeskero fabot ando schtacko ando bersch 2013 le krisiatar upre asdim ulo.

Rumenitike Roma pumare familjenca ale

Ando bersch 2013 mindig buteder familiji Gereciste te gudulinel ale. Upre pelo, hot pumare cile familijenca ale taj khetan le tschavenca gudulinahi. O Pucher te adale Romen upre lija taj meg adi 40 Roma andar i Rumenija, butvar familiji ande leskeri komora, save le gudulinipestar vaj eklik uschtidima butjatar dschin.

Pucher kivaninel peske, kaj o khetanipe i historija le Romendar ande lengeri godi anen taj lengero tschoripe taj lengero dschivipe hajon.