Logo Opre Heores Collective
Opre Heores Collective
Opre Heores Collective
Roma sam

Ioana Spataru pedar gondolipe taj viderschtaund

I Ioana Spataru butschalinel sajt 2015 ojs aktivistkija taj trenerkija le manuschengere tschatschipengere sikadipeske. Akan schtudirinel oj kultura- taj socijalantropologija taj ande pro schtudijum pedar temtscha sar palgondolipe taj identitetakero entviklinipe le etnischi tschulipendar, sar groboskere taj gondolipeskeri kultura ando kontekst le holocaustistar oj pe donde bescharel.

Oj keraschkija taj vodaschkija le ternengera inicijativatar „Opre Heroes Collective"-jatar hi, save pumaro pharipeskero punkto upre holocaust-sikadipe taj palgondolipeskeri politika beschartscha. La Ioana Spatarusake jek aun paschlaripe hi o sterijotiptscha pedar o Roma taj Sinti andrutnon le gadschendar tel te bauninel. Te o upre butschalinipe le porajomosistar taj o donde bescharipe le upre butschalinpeha taj palgondolipeskera kulturatar jek barikano punkto hi. Uso kesdipe sina o donde bescharipe la ajgeni familjiakera historijatar taj la ajgeni identitetatar, savi la uso aktivismus ledschija. Jek terdschivipe latar sina o gondolipeskero mulatintschago „Dikh he na bister!“ ando bersch 2014. 1000 Roma taj Sinti ande Auschwitz sina khetan le opferenge le nacijonalsocijalismusistar te gondolinel. Jek terdschivipe, savo na buter te pobosterel hi, phukal oj.

Na tschak vasch berschengere geniptscha dschal buteder vasch manuscha taj lengeri historija

Sajt 2019 o schero andar „Opre Heroes Collective“, jek Romengero projekto, savo o dikipe upri kunst taj gondolipeskeri buti paschlarel hi. On butvar ischkolaschenca taj meschterenca butschalinen, kaj pedar i historija le Romendar taj Sintijendar buteder dschanipe te uschtiden – andi forma seminarendar taj ande „workshops“. Imar maschkar i ischkolakeri cajt i Ioana Spataru esbe lija, hot i historija le Romendar taj Sintijendar tschule ando ischkoli sikade on. Te o donde bescharipe le Romendar taj Sintijendar ojs opferengeri grupn le nacijonalsocijalismusistar igen tschule pedar sikado ol. Vaschoda odola temtscha ande amare „workshops“ taj seminartscha upre lijam. Schaj hot jefkar adala aunbtiniptscha le ischkolaschenge taj meschterenge na buter pekamle on, te adala temtscha jek falato le sikadipestar ovna, phenel i Spataru.

Opre Heores Collective
Opre Heores Collective

O Roma taj Sinti igen dur andar o historijakero sikadipe ar tschapim sina, kaj te hajol soske, iste tut la historijaha le Romendar taj Sintijendar donde beschares. Kada o Roma taj Sinti andar i nord Indija ando maschkarutno bersch andi Europa ale, le europitkengere dschenenge on na prindscharde sina taj eksotisch. Ada gondo igen dur ando schero le dschenendar sina. Te anndi ischkola aja tema ande diferenciri koja taj keripe behaundlim ol. O glajchi hi le upre butschalnipeha le holocaustistar ando ischkoli. Ando sikadipe dschal o gendo taj o anava te siklol, na vaschoda, o terdschivipptscha le dschenendar so lenca kerdo ulo pe donde te bescharel.

O 16. maj hi o „Romegero viderschtaundiskero di“, upre ada di palgondolim ol upre odola Roma taj Sinti, save 1944 ando logeri Auschwitz Birkenau viderschtaund gejng o murdaripe kerde. Te ada hi datum, savo ando ischkoli na behaundlim ol, phenel i Spataru.

„I historija na papal al, oj rajminel pe.“

Le holocaust sikadipeske o manuschanipe falinel, phenel i Spataru. Na tschak vaschoda dschal o berschengere geniptscha te dschanel, o manuschengere terdschiviptscha taj lengeri historija pal tedschardo hi. I koja le palgondolipestar te la preventacionake barikano hi. „I Historija na papal al, oj rajminel pe“, phenel i Spataru. Iste le kale taj parne gondolipestar bejg dschas taj i historija andi cili kompleksiteta dikes, phenel i aktivistkija.

Opre Heroes Collective
Opre Heroes Collective
I Ioana Spataru

2020 sina adala temtscha online workshopsendar, save o „Opre Heroes Collective" tel likertscha. Use jek usi tema “Romani Remembrance“, kaj vasch i historija le Romendar taj Sintijendar andi Europa taj i gondolipeskeri kultura gelo, taj usi avri tema „Romani Leadership“, savi pe le viderschtaundiha andrutnn la „Community“-aha donde beschartscha. Le „Opre Heroes Collective“-iske, jek aunpaschlaripe hi, sar akan le online workshopenca, te butschalinel, kaj buteder dschene reste schaj on.