Ande amari erschti sendung ando bersch 2021, o Romengero aktivisto taj keraschi le farajnistar HANGO Roma, Martin Horvath, amaro kherodaschi hi.
O Martin Horvath taj o farajn HANGO Roma ham na tschak videjoskere koji uso mindenfelitike receptscha kerde, on adale projektiha te uso sensibilisirinipe taj upre klerinipe la kulturatar le Romendar ande mindenfelitike workshops use ledschen. Taj ov te pedar vakerel, hot o projekto Romengeri kojnha le farajnistar Roma-Service, avrija hi sar ada.
Vasch i Corona pandemija iste peske o Martin Horvath le projektenge gondi kertscha taj afka akor o planimo workshop ando decemberi 2020 ande pri kojnha ledschija taj jek online-mulatintschago kertscha, kaj but Roma taj gadsche use sina.
Na tschak o thajipeskero workshop iste o Horvath avrija kertscha, te avre mulatintschage opfertscha la Corona pandemijatar ule.
O Martin Horvath ando 16to novemberi 1982 upro them alo taj pre erschti tschavengere berscha Tenu Erbate upre lo bartschino. Odoj pra dajaha taj pre dadeha taj pre phralenca taj pra phenjaha ande jek bari familija dschivlahi lo, dschimeg Erbate cidine. Andi ischkola o Martin Erbate gelo. Andi hauptschul erschitvar i diskriminacija taj o teldikipe, esbe lija.
Te o arsiklipeskere schajiptscha le Romenge ande oja cajt meg igen tschule sina. Kekaj afka sina, o Martin na dija upre taj mindenfelitike butjenca pedar o paj pe likertscha, taj pro cil, la flogoskera grupnake te butschalinel, schoha andar o atscha na naschatscha.
Adi ando berotinipeskero than „DROM – Empowerment le Romenge“ le betschitike flogoskere utsche ischkolendar butschalinel taj te uso BFI Erba uso projekto „Rombiz“.
2018 khetan le botakere scheroha la organisacijatar „Lebenszeichen Österreich“ Nadine Papai, o farajn HANGO Roma kertscha.
Ande pri naphandli cajt o familijakero dad jeka tschajatar, andi nevi kerdi Samer Banda cidel.
Adale berscheske o frischno sohardo familijakero dad le farajniha HANGO Roma poar mulatintschage planintscha. Jek koja hi o Romengero mulatintschago 2021, savo mindig jek pharipeskero punkto andi mulatintschagoskeri kultura le burgenlanditike Romendar, hi.
Meg but avre projekti le farajnistar HANGO Roma del, save upre lengeri vebsite papal gende schaj on. Odoj te jek dikipe pedar o thajipeskere workshops le receptenca le mindenfelitike habendar andar i kojnha le Romendar, laken.
O Martin Horvath le berscheske 2021 buteder andbescharipe le terneder Romendar ando than le Romengere aktivismusistar peske kivaninel, mint ande oda sektor, imar but ando pensijonakero phuripe hi taj tschak „tschulo palal“ al, sar ov phenel.