Jek kenva pherdi hischenca hi, udutane sune dikipeskere kojenca, bibastale phuvenca. Andi Graphic Novel le italitike cajchneristar Davide Reviati, savi akan te ando nimtscko prikbescharipe angle paschlol, o rejalismus taj o bibastale sudikipeskere sekvenca khetan fojinen. Taj na mindig nan dschando, kaj o jek kisetinel taj o kija kesdinel.
Andi bojd 600 riktschengeri sorali kenva, o Reviati mindschart duj historiji phukal: Ada hi upri jek rik jek o autobijografischi inspirirti phukajipe jeke upre bartschojipestar andi norditiki italitiki provinca, valakada ando 1960te vaj 1970te berscha, ande jek tikno gav, kaj o tschave upro mesuji pumen khelen taj o terne pumari cajt le dschiniha taj le tschojntenca mule tschalan. Ando maschkarutno punkto terdschon o butjakere ischkolaschtscha Guido, Grisù taj Katango, save pumare dschivipeha na tschatschikan valaso te kesdinel dschanen. Ando sikajipe tschak igen tschule aun te dikel pumen muken, on merescheder telal usi len kifinen, duach o gaveskere diskos ciden vaj billard ando mojakero khelen.