„Pal sako manusch jek historija pe garul…“
Jek le scheroskere aunpaschlojpestar le projektostar DROM hi, i situacija, o aunpaschlojiptscha taj o pekanschage le Romendar taj Romnijendar te sikal. Afka jek arparujipe maschkar o Roma taj o gadsche kerdo te ol. Pasche o orijentirinipeskere berotiniptscha, o sikadipeskero- taj o butjakero berotinipe taj o vodinipe ando butjakero dschivipe, le dschenenge andar o projekto DROM butvar vaschoda dschal, individujeli upre sako klijento and te dschal. „Pal sako manusch jek historija pe garuel“, afka o projektoskero schero Michaela Schipper-Schauer.
Radijo „Roma sam“ | 14to decemberi 2020 | 20:50 orenge
Live Radio Burgenland
Jek barikano than ando Empowerment le Romenge o usegejipe uso sikadipe hi. Ando eftvardeschte taj oftovardeschte berscha le 20te schelberschengostar o Roma taj o Romnja butvar mindschart andi sonderschul te ispidim ule. Duach o and bescharipe le Romengere-aktivistendar ando lejcti berscha schofim ulo, hot flogoskere grupnakere dschenen akan o glajchi usegejipe uso sikadipeskero sistemo hi, sar le avren. Te upro butjakero foro irintscha pe valaso, kekaj adaj maschkar o thaneskero taj o foroskero than mindenfelitike koji del, mint ando thaneskero than meg mindig buteder teldikiptscha del sar ando foroskero than taj ada o rodipe jeka butjatar phareder kerel, afko o DROM-beroteri Martin Horvath.
DROM konkreti pomoschago sar o beverbinipeskero pomoschago vaj pomoschago uso keripe le beverbinipeskere papruschendar taj workshops use mindenfelitike temtscha del, phukal o Horvath.
„O dschene ojs famitlertscha pasche terdschon…“
Butvar Roma taj Romnja, saven phutschajiptscha uso butjakero foro hi, uso DROM an. O phutschajiptscha dschan usar „Sar kerav jek dschivipeskero naschipeskero pisinipe?“ dschi otscha use schpecijeli phutschajiptscha ando umgejipe le birovtschagenca. O dschene le projektostar DROM te uso aunrodipe vasch mindenfelitike schtotlichi lojengere pomoschage pomoschinen, te ada pekamlo hi. O dschene le projektostar DROM famitlertsch hi taj le manuschenge pasche terdschon, savenge ada pomoschago pekamlo hi, afka i beroterkija Anna Wiertelorz.
O projekto le Romendar igen latscho upre lim ol, ham amen meg te mindig use sam, buteder klijentscha taj klijentkiji, savenge pomoschago pekamlo hi, te lakel. O klijentscha taj klijentkiji imar pal tschule berotinipeskere ori jeriniptscha diken, save pumen afka sikan, hot jek nevi buti lakli vaj jek nevi perspektiva schofim uli, phukal o projektoskero schero Michaela Schipper-Schauer. DROM jek falato le betschitike flogoskere utsche ischkolendar hi taj vaschoda le but berschengere terdschijiptschendar ando sikadipe le bare dschenenca, schaj profitirinel. Akan te online-mulatintschage use mindenfelitike temtscha aun dim on.
Adaj ham tschatschikan vasch Empowerment dschal, hat vasch o ajgeni keripe le Romendar taj Romnijendar. On use problemtschengere koji vodim on, kaj ham diklo ol, vasch saj problemtscha taj phutschajiptscha adaj dschal – mindig jek individujeli berotinipe hi, savo mindenfelitiko dur schaj dauerinel, phukal i Anna Wiertelorz.
„Te amenge jek intensivi cajt hi…“
Vasch i Corona-pandemija taj o Lockdown na del akan nisaj direkti berotinipe. Kekaj afka hi, kamaha amen le klijentenge taj klijentkijenge pasche te terdschol, ando momento ada ham tschak peder o harango vaj jeke mailiha dschal, phenel i Wiertelorz. O workshops taj o mulatintschage online kerde on. I pandemija te but virtschoftlichi problemtscha peha anel: But na dschanen, sar la butjaha bajder dschal. Te adaj o dschene le projektostar DROM le manuschenge pasche terdschon. „Te amenge jek intensivi cajt hi“, afka i Wiertelorz.
Taj te vaschoda dschal, DROM bajder te entviklinel taj neve metodi te lakel, save jek schajipe le cukunftakere pomoschagostar den. Vaschoda jek beroterengero-klijentengero/klijentkijengero-khetanipe igen barikano hi, kaj pedar dugeder cajt khetan butschalim schaj ol. Butvar andral intensivi vakeriptscha neve perspektivenca ari an, phenel i Michaela Schipper-Schauer meg use.
Buteder informacija uso projekto taj o kontakto jeke berotinipeske laken tumen telal www.vhs.at/drom. Le usegejipeske uso projekto DROM nischta te potschinel nan.