Gejng strutureli tel dschumipe te kejmpfinel
O ungrike birovtschagi iste valaso keren, kaj tena o terne la tschulipatar i ischkola tel te phagen. Use iste o ungriko jek bulhi sikadipeskeri ofensiva kerel taj le meschtertschen feder siklipe te del, phenen o ekspertscha.
Te o sastipeskero fasorginipe le Romendar taj o use gejipe uso atschipeskere khera le kremijumiske phare gondi kerel. O ungrike birovtschagi iste buteder socijalakere khera kisetinen. Te iste diklo ol, kaj o tschatschiptscha gejng i diskriminacija le tschulipendar andi sastipeskeri koja prik beschardi te ol. O kremijum meg phenel, kaj o politikertscha ando pradimo gejng prasajipeskere vakeriptscha taj diskriminacija la tschulipatar iste pumaro alav asden.
Andi europitiki unijona dschin valami schov milijona Roma, lek buteder andi sudosteuropa, butvar on telal bibastali socijali taj virtschoftlichi situacija iste dschin. Kekaj le EU-akere schtotschen diskriminacijakere fabotscha hi, butvar on argranicalim on. On te igen phare use gejipe uso sikadipe taj buti uschtiden.
O 1949 kerdo europitiko rot le beschipeha ando francitiko Straßburg pe ande bescharel le arakipeske taj ande likeripeske le manuschengere tschatschipendar. Uso eruoptiko rot 47 mitgliderengere schtotscha use hi.