„Me le te phenel kama: Dschijakana na kertscham dosta“, phentscha i dujti presidentkija la komisijonatar Vera Jourova, sridon ande Brüssel. I bibastali situacija le tschulipestar jek „dukajipe upro gondo la Europatar“ hi.
Andi europitiki unijona valami schov milijoni Roma, butvar andi sud ost Europa dschin, butvar telal bibastale socijali taj virtschoflichi koji. Kekaj o EU-jakere schtotscha diskriminacija fabijatinde, butvar ar granicalim le on. Use meg al, hot igen pharo usegejipe uso sikadipe taj usi buti hi len.
I diskriminacija taj o rasismus upro epasch te dschuminel
Akan o EU-jakere schtotscha dschi ando septemberi 2021 te nacijonali strategiji angle te paschlaren, kaj le glajchi terdschojipeske le Romendar pomoschim schaj ol. I EU-jakeri komisijona o falato le Romendar, save diskriminacija taj rasismus terdschin, upro epasch te dschuminel. Pal EU-jakere datscha valami 40 procenti le Romendar phenen, hot ando lejcti pantsch berscha, la diskriminacijake ar bescharde le sina.
Feder keriptscha i komisijona andar o pomoschagoskero sistemo le opferenge taj le sensibilisirinipeskere kampanjendar ando ischkoli peske uscharel. Avre ciltscha hi o glajchi usegejipe uso sikadipeskere koji, usi buti taj uso fojinipeskero paj. Ande ada bersch, o EU-jakero koja le nacijonali strategijenge usi integracija le Romendar, savo ando bersch 2011 kesdintscha, ar naschel.
O plan i situacija le Romendar ande but vilagi upro diveseskero angle dipe antscha, phentscha i Jourova. Akan vaschoda dschal, tschatschikan iriniptscha te bevirkinel. „Me upre patschav, hot ada EU-jakero plan use pomoschinel, o gondi te soraljarel“, phentscha i komisarkija. Ando septemberi o europitiko parlemento la komisijonake phentscha, hot buteder le tschulipeske te kerel.