Israelitische Kultusgemeinde Graz
Christian Jauschowetz
Christian Jauschowetz
RASISMUS

Prik astaripe upri dschidovtschengeri gemajnde

Palo prik astaripe upri dschidovtschengeri gemajnde Gereciste, o harengere jeka agjeni grupnaha palo teteri rodnahi. Kurke akor jek dscheno astardo ulo. Ov harengerendar, save le kerekoha dromeske sina, ando andrutno foro astardo ulo, pisinde i „Kronen Zeitung“ taj i „Kleine Zeitung“. Jek vakeraschi le harengerendar ando vakeripe la APA-ha phentscha, hot adala pisiniptscha tschatsche hi.

Palo pisinipe andar i „Kleine Zeitung“, o mursch jeke lole kerekoha andi Annenstraße dromeske sina. O harengere palo rodipeskero kipo, papal prindscharde le. O astardo limo mursch je sirischi schtotiskero polgari te ol, savo angle schov berscha andi Austrija alo. O andrunto minsteri Karl Nehammer (ÖVP) upre Twitter o astaripe ar dija taj le duj kolegenge, save le mursch astarde, palikertscha.

Israelitische Kultusgemeinde Graz
Christian Jauschowetz

Obste o astardo mursch tschatschika o teteri hi, savo suboton kirati le presidento la israjelitika kultusakera gemajndatar (IGK)Gereci, Elie Rosen, tschatschikan aun astartscha, meg nan phendo. Pal erschti informacija andar o andrutno ministerijum, o astardo mursch, ham imar arphendo kertscha. Falati adale arphendostar le astardo lime murschestar, leskero telschtaminipe taj leskeri motivacija, ham erscht ando ratschaskere ori, ar dim schaj on, butscholahi.

Elie Rosen
Christian Jauschowetz
Elie Rosen | Presidento la israjelitika kultusakera gemajndatar (IGK)Gereci

O Elie Rosen, suboton kirati anglo gemajndakero kher, jeke na prindscharde murschestar, jeka dorongaha, aun astardo ulo. Ov meg ande pro verda schaj pe retintscha taj uso prik astaripe na ulo ov dukado. O teteri naschi gelo.