ORF TVthek | Servus, Szia, Zdravo, Del tuha | 9to august 2020
Baranka gondolipeskekero mulatintschago upro Belgraderplatz Betschiste
O tradicijoneli Baranka gondolipeskero mulatintschago ada bersch na sar mindig ando maj, vasch i Corona pandemija, erscht ando juli mulatim ulo. Te akana o mulatintschago ando 2to juli ando betschitiko Baranka park telal barikane uprediptscha tel likerdo schaj ulo, ham ada le hangoske nischta na kertscha.
Barikani antifaschistkija Ceija Stojka
I prik dschivdi, molerkija taj pisimaschkija Ceija Stojka jek le phenjendar taj prahlendar le Mongo taj Karl Stojkastar hi, save sar oj, ando logertscha and tschapim sina taj prik dschivde. I Ceija pra dajaha harno anglo haburi andar o logeri Auschwitz-Birkenau ando logeri Bergen Belsen ledschim uli, kaj oj ojs 12 berschengeri tschaj, putrim uli.
Palo habrui i Ceija Stojka, savi ando bersch 1933 upro them ali, Betschiste dschivlahi kaj ando bersch 2013 muli.
I kinstlerkija Ceija, saj dur li dschivlahi, le upre butschalinipeske la historijatar taj la gondolipeskera butjake pe vidmintscha taj pre kipenca probalinlahi, pedar lakere phare duka, save oj terdschivtscha, te jerinel.
I Lovarica Ceija Stojka, savi o NS-murdaripeskero rajipe prik dschivtscha, but taj mindig, gejng o nacijonalismus taj o pobisteripe andi cajt la dujta republikatar kertscha, and pe beschartscha. Harni cajt paloda oj muli, ando bersch 2014 jek than Betschiste pal i barikani antifaschistkija, akardo ulo. Jek patijaripe taj aunprindscharipe lakere keripestar.
„Khetan te gondolinel“
Upre ada than, sako bersch jek mulatintschago upro internacijonali Romengero taj Sintijengero holocaustiskero gondolipeskero di ando 2to august, kerdo ol. Ande adi di upro epasch milijoni Roma taj Sinti gondolim ol, save le Naci-reschimistar murdarde ule.
Organisirim ulo o mulatintschago le farajnistar Lovara-Roma Austrija.
Workshop | „Terne Romengero soralipe“
Ando maschkaripe le julistar ando Palais Porcia Betschiste o triti workshop usi tema „Terne Romengero soralipe“ tel likerdo ulo. O dschene le nacijonali Romengere kontaktoskere thanestar le bundakere kancleriskere birovtschagostar le aktivistkiji taj aktivistschen taj le flogoskere grupnakere fatreterkiji taj fatretertschen akarde, khetan pedar jek strategija uso pomoschago le terne Romenge, te diskutirinel.