90 berscha palo lapatakero posajipe akan papal investirim ol. Andar o historischi kher, jek sastipeskero centrum kerdo ol, phentscha o OSG-schero Alfred Kollar. Pasche badartscha, te avre sastipeskere koji odoj te del. Afka jek igen bulhi paleta akor del. Sa usi tema sastipe telal jek hibo ando centrum le forostar khetan te phandel taj na avral o foro, afka o Kollar.
Kher afka te atschol sar lo hi
Kaj o kher telal arakipe terdschol, na tromal o dikipeskero kipo irim te ol. Muguli o nimcengero seleno feschto le boklendar taj le vudarendar iste atschol. Afka hi, hot Erbate na but bare bauninipeskere verktscha del taj vaschoda barikano hi, hot i OSG ada kher upre likerl taj asaj kamlo nevarel, phentscha o architekto Martin Schwarz. Duach o sanirinipe le akaripeskere birovtschagoha schaj jek schukar hango ando kher ol, savo pe akor te upro pacijentkiji taj pacijentscha ar virkinla, afka o Schwarz.
Schtar milijoni Euro investirim on
La Erba ada jek jerinipe hi, kaj i kasarna, savi schutschi hi, papal dschivdon ol, phentscha o biro Georg Rosner (ÖVP).
Sastipe jek bari tema hi taj amen loschanas amen, hot ada centrum akan ando maschkaripe le forostar kerdo ol taj o foro papal buteder dschivdon ol. Ada le foroske schukar hi, afka o Rosner. I OSG ando bauninipe schtar milijoni Euro investirinla. O kisetinipe le terne dschendiske ando arto bersch planim hi.