ORF TVthek | Roma sam | 22.6.2020
O ischkolakeri khera le Komenský farajnistar le betschitike flogoskere grupnenge, le tschechitikenge taj slovakitikenge, igen barikano hi.
Adi o ischkoli ande duj khera ando triti betschitiko gemajndakero becirk hi. Upro Sebastianplatz jek tschavengeri bar taj jek flogoskeri ischkola del taj andi Schützengasse jek maschkarutni ischkola taj jek rejalgimnasijum, saven i tschechitiki, slovakitiki taj i nimtschki tschib ojs sikadipeskere tschibtscha hi.
O ischkoli privati ischkoli hi taj vaschoda duach o austritiko tschulipengero tschatschipe pomoschago te uschtidnahi. Afka o financirinipe le ischkolendar le betschitike tschechijendar taj slovakendar duach o pradimi va schaj dim ujahi.
Ham dschijakana andar o cile probaliniptscha na ule nischta. Ada o anglebeschaschi Karel Hanzl anglo keripe la neva kojalicijonakera regirungatar ando decemberi 2019 use jek reporterengeri konferenca meg jefkar upro punkto antscha.
"O pomoschagoskere flogoskere grupnakere loj iste buteder on, le cilenge, taj te le flogoskere grupnakere medijenge buteder loj iste delahi. Pal mro muaninipe o pomoschago le ischkolakere kojaske Betschiste o lek barikaneder hi.
Odoj igen phare ojs ischkolakero farajn Komenský kejmpfinas. Amen iste dschijakan o cile koji, save aun peren, ojs privati organisacija potschinas. Amen jek privati ischkola pradime tschatschipeha sam taj afka hi, hot o daja taj dada o sikadipe lengere tschavendar potschinen, so ham o koja le schtotistar ovlahi", phentscha o Hanzl.
Ando Komenský ischkoli tschave usar 2 dschi 18 berscha andi tschechitiki, slovakitiki taj nimtschki tschib sikade on, sa pal o moto „Duj tschibtschenca usar i tschavengeri bar dschi usi matura“.
O gendo le klasendar taj ischkolaschendar ande ada ischkolakero bersch andi tschavengeri bar ande 6 grupn 113 tschave hi, andi flogoskeri ischkola 8 klastscha 179 ischkolaschendar del taj ando rejalgimnasijum ande 12 klastscha 243 ischkolastscha del.
Lejcti vodinipe le Ludwig Horvathiske
I flogoskeri grupn le Romendar jeke vodschikane, barikane manusch naschatscha. O prindschardo Romengero-aktivisto Ludwig Horvath ando 18to juni 2020, 65 berschenca, mulo.
Ando 24to juni 2020, sridon, 17:00 orenge, o Ludwig „Burli“ Horvath ando römisch-katolischi temetischi Erbate, ande handlo ol.
I Roma-redakcijona le ORF-istar hori, esbe limo vodschikanipe le dukade naschajipeske, ar dschuminel.