Ando Schanzenviertel ando foro Hamburg, keden, ando 12to maj 2020, jek gondolipeskero bar, savo upro tradipe taj murdaripe le Sintostar Johann „Rukeli“ Trollmann pal gondolinel, na prindscharde teterendar SS-runenca aun maklo ulo.
„Tschak poar divesa pal o 75to berscheskero di le putripestar ando 8to maj ada bibastalo keripe sina. Vaschoda o donde bescharipe le anticiganismusiha barikano hi taj i aundefinipe hi, o adiveseskero barikanipe la polgarengera tschatschipeskera butjatar te gejng rechti tradipe taj keripe, upre te sikal“, phentscha o anglebeschto le thaneskere farajnistar le Sintijendar ande Hamburg, Arnold Weiß.
„Sinti taj Roma andi Germanija taj andi Europa mindig buteder jeke bibastale rasismusiske ar bescharde hi. O agresivi anticiganismus andi erschti rik gejng o Sinti taj o Roma pe terdscharel, ham ando punkto gejng amari demokracija“, phentscha o anglebeschto le centrali rotistar le nimtschke Sintijendar taj Romendar, Romani Rose.
1942 o Trollmann ande Hannover astardo ulo taj ando logeri Neuengamme ledschim lo ulo. Paloda ov jeke SS-upre dikaschistar ojs o bokseri Trollmann prindschardo ulo, iste ov sako kirati gejng murscha la SS-atar boksinlahi. Ando linaj 1944 o Trollmann ando logeri Wittenberge jeke kapostar murdardo ulo.
Dschene, save odoj dschin taj oda bibastalo keripe dikle, o NS-simboltscha bejg kosle taj o gondolipeskero bar schuscharde. O thaneskero farajn le Sintijendar ande Hamburg e.V. auncoaginipe kertscha.