Gericht
Sebastian Duda
Sebastian Duda
UNGRIKO

Loj le Romengere-tschavenge

O ungriko lek utscheder kris le diskriminirime Romengere-tschavenge loj use phenel.

O ungriko lek utscheder kris le familijenge le 60 Romengere-tschavendar loj use phentscha. O tschave andi ischkola (Aunm.: andi gemajnde Gyöngyöspata) but berscha putrim le avre tschavendar sikade ule taj uso usinipeskero sikajipe taj uso roasiniptscha, na tromanahi le use te ol. Putrimo sikajipe vasch o telschtaminipe ando Ungriko ilegali hi. O kris akan le phendoske la anglutna instancatar, savo le ministeriskere presidentostar Orbán ojs „na tschatscho“ akardo ulo, use phentscha.

Roma-Kinder in der Schule
Pester Lloyd

O panasi tschijipe gejng i ischkola taj o komunali birovtschage jek tschavengeri tschatschipeskeri organisacija ando anav le familijendar kertscha. Akan on valami 300.000 Euro uschtiden.

I nacijonalistischi-populistischi ungriki regirung imar o erschti phendo igen sorale kritisirintscha. Afka o ministerengero presidento Orbán phentscha, hot o Romengere-familiji loj uschtiden, kekaj on nischta vaschoda na butschalinde. I regirung muguli jek phutschajipe ando cilo vilago vasch ada krisiskero phendo te kerel kamlahi, ham vasch i Corona-krisa, naschtig o phutschajipe kerdo ulo.