Roma sam | 30.3.2020 | 20:50 orenge
Radijo Burgenland
Rasismus taj diskriminacija pal dschuminel o plurali, mindendenfelitiko khetanipe
Vaschi aktujeli situacija pharo hi, i prognosa la cukunftake tel te del, phenel o Emmerich Gärtner-Horvath, anglebeschto le flogoskere grupnengere bajrotistar le Romendar ando aktujeli ardipe la sendungatar Roma sam. Ando koji rasismus taj diskriminacija meg mindig bare problemtscha andi europitiki unijon del, phenel o Gärtner-Horvath.
Türkis-Grüne kojaliacija del schajipe
La regirung jek nevo programo hi, savi la flogoskera grupnengera politikake jek redo parujipenge angle dikle hi, vaschoda likeren o cile anglebeschte le schov aunprindscharde flogoskere grupnendar vakeriptscha le fartreterenca la kojaliacijakera regirungaha.
I bundakleri ministerkija le dschuvlenge taj integracijake Susanne Raab barikane le likerel, kaj ando koji diskriminacija taj sikadipe aunbeschardo ol, phukal o Emmerich Gärtner-Horvath. i clubakeri dschuvli le selenendar (Grüne) Siegrid Maurer priminel le flogoskere grupnengere fartreterenge, hot sa kerdo ovla, kaj o aunpaschlariptscha le tschulipendar prik bescharde te on, phenel o Gärtner-Horvath meg use.