Ande aja bibastali cajt, kaj amen o Corona-virus pal likerel taj o pradimo dschivipe pal dschuminel, naschtig o imar dur planime mulatintschage tel likerde on. Vaschoda o Samuel Mago le fartetenca le Romengere-organisacijendar jek vakeripe kertscha la sendungake Roma sam kertscha.
O farajn Romano Centro Betschiste dschidokle o socijali berotinipe taj i ischkolakeri medijacijona le Romenge upre Home-Office prik terdschartscha, kaj te na nisaj direkti socijali kontaktscha del. O berotinipe pedar o harango taj te online ham del, phenel o dujto schero Mirjam Karoly.
Butvar i situacija le Romendar andi ostitiki Europa akan igen brigaschni hi, afka i Romengeri-aktivistkija taj aguno schero le Romengere-kontaktiskere thanistar andi OSZE.
Te o mulatintschago le farajnistar Voice of Diversity, savo ando Porgy & Bess Betschiste ujahi, vasch o Corona virus tel phendo iste ol. O schero Valerie Stojka ando harangoskero vakeripe phenel, hot o mulatintschago ando terno dschend tel likerdo ol.
O sako berschengero upre cidipe la Romengera astavatar anglo Betschitiko gemajndakero kher ada bersch naschtig kerdo ovlah. O dujto schero le farajnistar Voice of Diversity, i Marion Dworzack phenel, hot te o gondolipeskere mulatintschage, afka sar o Barankapark-mulatintschago ando 20to maj taj o internacijonali gondolipeskero di upro flogoskero murdaripe le Romendar ando 2to august le vasch o ar dime tschatschipe, na tel likerde schaj on. Informacija uschtiden upri aun dimi vebiskeri rik www.voiceofdiversity.at.
Le birovtschagendar mangel i Dworzack, informaciji pedar o Corona virus te le dschenenge le tschulipendar taj te andi flogoskeri grupnakeri tschib le Romendar.
Kaj te na o virus pe telal o manuscha ar te bulharel te dschanel, te i Romengeri utschi ischkola Erbate, pre anglevakeritpscha, geniptscha ando but gava ando Burgenland tel phentscha. Te o mulatintschago uso Internacijonali Romengero-Di, savo ando terno linja 2020 kerdo ovla. O Horst Horvath, fatreteri la organisacijatar le flogoskere grupnakere dschenendar mangel, hot kher te atschon taj ko kamla, schaj pe upri vebiskeri rik www.vhs-roma.eu pedar o aktivitetscha la flogoskera utscha ischkolatar informirinel.
I Gilda Horvath, schero la online medijakera seletoskera formatar Romblog.at, akan jek inicijativa kertscha, kaj andi cajt la Corona krisatar o schajipe le fanecinipestar le fatreterenge la flogoskera grupnatar ando socijali mediji te del. Upri Facebook-rik „RomaSintiWireOnline“ anglevakeriptscha, workshops taj live-videjos ulade on.
I reporterkija Gilda Horvath le flogoskere grupnakere dschenendar mangel, hot solidariteta te sikan, taj kher te atschon.
I cajt ando ajgeni schtar fali schaj, te tumen interesi hi, upro riktscha afka sar www.romblog.at, www.romane-thana.at, www.bpb.de, www.romaday.org vaj www.facebook.com/radioshunes nucinen taj te le kojenge la flogoskera grupnake le Romendar, schaj tumen ando socijali necverktscha ande bescharen.
Kedveschne schunaschkiji taj schunaschtscha! Adala cile informaciji laken tumen te upre amari homepage volksgruppen.orf.at/Roma.