Igor Matovic
Reuters
Reuters
SLOVAKIJA

OĽaNO jerintscha o völinipe andi Slovakija

I partaj le botaschistar Igor Matovič o parlamentoskero völinipe jerintscha taj o but bershengero rajipe le socijaldemokratendar phagla. I latschi virtschoftlichi situacija le slovakitike Romenge jek schajipe del.

I protestoskero partaj OĽaNO le botaschistar Igor Matovič subota uso parlamentoskero völinipe andi Slovakija jek barikano jerinipe ande ladija. I partaj OĽaNO upre bojd 25 procentscha le hangijendar ali. Le 18,4 procentenca le völinipeskere hangijendar iste o ministerengero presidento Peter Pellegrini la partajatar Smer-SD jek valami 10 procentengero naschajipe aun lel.

Stimmabgabe in der Stadt Trnva
picture-alliance/AA/O. Marques

O Marian Kotleba pra nejo-nacistischi partajaha „I flogoskeri partaj Amari Slovakija“ papal loke ando parlamento ande cidija taj akan 17 le 120 beschariptschendar ande lel. Pasche o mangipe le NATO-jiskere argejipesstar la Slovakijatar taj i bibastali kritika gejng i EU, o Marian Kotleba mindig gejng o Romengero-tschulipe taj o migrantscha bibastale tradel.

„I Slovakija nan nisaj arlipe, mint popuismus akan upro cilo them o rajipe ande lel“, phenel o Pavol Múdry, upre dikipeskere rotiskero vakeraschi la slovakitika reporterengera argenturatar SITA. Afka hi la triti sorali partaj „O progresivtscha“ jek bulho programo taj latsche kanditatscha, ham o manuscha andi Slovakija na kamnahi oda te schunel, kaj o igen komplicirti hi. Jek inteligenti debata pedar o entviklinipe la virtschoftatar ando arte tranda berscha, nisaj interesi uso völinipeskere dschene na dschangarel, afka o Múdry.

„O mujsimo tschavengero barengero bersch le Romengere-tschavenge, savo imar i phuri regirung kertscha, i sikadipeskeri situacija tendencijeli feder kerla“, phenel o andi Bratislav dschivdo historikeri taj juristo, Simon Gruber. Pasche i latschi virtschoftlichi situacija, o gendo le dschenendar, saven buti nan igen tschulo hi, te le Romenge andi Slovakija o schajipe del, jek butjakero than te uschtidel, afka o Gruber ando vakeripe la flogoskera redakcijonaha le ORF-istar Burgenland.

Gedenken an Jan Kuciak und Martina Kusnirova
DWA. M. Pedziwol

Suboton, o völinipe o erschti pal o murdaripe le investigativi reporteristar Ján Kuciak sina, savo o khudinipe la socijaldemokratischi partajatar la organisirima kriminalitetaha ando pradipe antscha.