Le keripeha la neva bundakera regirungatar phirtscha o faunvoatinipe le schov oficijeli aunprindscharde flogoskere grupnendar andar o „Verfassungsdienst“ usi bundakeri ministerkija le bundakere birovtschagostar Susanne Raab (ÖVP).
I ARGE flogoskeri grupn mangel odotar o palijipe
I ARGE flogoskeri grupn upre ada jek pradimo lil le bundakere kancleriske Sebastian Kurz taj la integracijakera ministerkijake Susanne Raab mangla, o ar logerinipe le flogoskere grupnengere agendendatar andar o „Verfassungsdienst“ le bundakere kancleriskere birovtschagostar ando nevo integracijakero ministerijum pal te lel.
Palo arphenipe le ARGE flogoskere grupnengere fartreteristar Stefan Pauer taj Ernő Deák le flogoskere grupnenge nisaj pekamipe usi integracija pekal, mint on imar but berscha andi Austrija jeke smiromiskere khetan dschivipeske but kerde.
Hergovich: Brigaschno taj hamischno signal
Ojs „brigschno taj hamischno signal“ sikal o burgenlanditiko SPÖ-akero klubakero schero Robert Hergovich taj leskero birotschagoskero kolega andar Kärnten Herwig Seiser o ar paschlaripe le flogoskere grupnengere agendendar andar o bundakero kancleriskero birovtschago ando integracijakero ministerijum.
Palo Hergovich o flogoskere grupn imar dugi cajt ando than fa vurclim hi taj schoha na jek integracijakero keripe lenge pekamlo ol. So duj klubakere dschene mangen, hot i flogoskeri grupnengeri agenda papal ando „Verfassungsdienst“ le bundakere kancleriskere birovtschagostar pal paschlardo te ol.
Fazekas: Kinstlichi konstrujirti debata taj panikakero keripe
O flogoskero grupnengero vakeraschi andar i ÖVP andar o Burgenland Patrick Fazekas becajninel o mangipe le SPÖ- klubiskere dschenendar ojs kinstlichi konstrujirti debata taj panikakero keripe.
Ov mangel la SPÖ-akera regirungatar ande Burgenland, buteder loj le flogoskere grupnenge otscha te del taj o flogoskere grupnengere tschibtscha ando cile sikadipeskere koji feder pomoschipe te del.
Ando gejng soc uso than i bundakeri regirung jek latscho keripeskero plan konkreti keripeha angle paschlartscha, savo o uscheder keripe le flogoskere grupnengere lojendar taj o medijakero pomoschago taj o soralipe le flogoskere grupnendar ando ORF angle dikel, phenel o Fazekas.