O dajakero tschibtschakero sikadipe „Burgenland Romani | Roman“ papal aunprindscharipe taj akceptanca telal o familiji taj o ischkolaschkiji taj ischkolaschtscha uschtidel.
Akan ofto tschaja taj tschave le Roman-sikadipeske andi flogoskeri ischkola Erba aun pumen mejdinde. Te andi europitiki maschkarutni ischkola, ischkolaschtscha del. Butvar le dajenge taj dadenge baro aunpaschlojipe hi, hot lengere tschave i tschib, i historija taj i kultura la flogoskera grupnatar te siklon, phenel o Emmerich Gärtner-Horvath andaro o farajn Roma-Service.
O kesdipe le telpisinipestar jek sensibli tema sina. Ando bersch 1993, Roma le lingujistiha Dieter Halwachs, Gereciste andi universiteta khetan pumen bescharde. Te o Mozes Heinschink pro pomoschago use phentscha. Imar ande oja cajt ando siklipe pal i ischkola o farajn Roma jefkar ando kurko Roman sikavlahi, kaj 30 tschave andar Romengere familiji use sina. Oda imar o kesdipe sina, phenel o schero le farajnistar Roma-Service, Gärtner-Horvath.
Igen barikano o latscho khetan butschalinipe le Romengere farajnenca hi, kaj afka i identiteta, i tschib taj i kultura la flogoskera grupnatar soraleder te ol, butvar le tschavendar, phenel o schero le tschulipengere ischkolakere birovtschagostar andi sikadipeskeri direkcijona Burgenland, Karin Vukman-Artner. „Sako te dschanel, kaj leskere vurclini hi“, phenel i Vukman-Artner.