Jek baro dukajipeskro naschajipe

O Stefan Pišti Horvath mulo | Großwarasdorf leskeri hajmat taj leskero kamipe sina

I flogoskeri grupn le Romendar taj Sintijendar jeke barikane muschikaschi naschatscha. Pal pharo nasvalipe kurke o cimbalakero khelaschi Stefan Pišti Horvath amendar gelo. Ov 70 berscha phurano sina.

O Stefan Pišti Horvath ando ungriko Bük 1949 upro them alo. Leskeri daj Anna, jek Romni andar Großwarasdorf, o logeri Ravensbrück prik dschivtscha. Oj ham naschtig buter upre oda than, kaj upro them ali pal geli, mint oja bibastali nacijengeri cajt naschtig pobistertscha.

Palo befrajinipe oj Bük geli, taj odoj le Istvan Horvathiha jek familija kertscha. O Pišti lengero erschti tschau sina.

Stefan Pišti Horvath & Roma Ensemble
ORF Archiv

Na dur iste on pumen papal vascho ungriko upre terdschavipe odotar upro drom kerde. Ando 17. novemberi 1956 ali i familija Horvath ande Großwarasdorf, kaj ando kher leskere papustar taj babatar ando Unterort 25, pumen tel mukle. Poar divesa paloda leskeri daj taj leskero dad le schovberschengere Stefanistar donde gele.

Aja tschavengei cajt le Stefan Pišti Horvathiske but duk pal mukla. Kekaj o raschaj leske but pomoschinlahi, ham o gadsche andar o gav na latsche use leste sina.

stefan štefan pišti horvath časna povelja pisti ehrenurkunde
ORF

O Pišti mindig pro khetanipe use pri hajmat gemajndi sikavlahi. Ham pal avlahi ov ande Großwarasdorf tschak te valaso te cidel delahi. O barikano kinstleri Stefan Pišti Horvath sakotan upre ada vilago sina taj 27 berscha dur la Austrija andar Tokio dschi Kairo fatretintscha. Ov le kiralenge taj schtotiskere presidentenge cidlahi.

Pal atschino jek barikano horvacko „Zigeuner“ andar Großwarasdorf, sar o Pišti pe söbst akarlahi.

stefan štefan pišti horvath časna povelja pisti ehrenurkunde
ORF

O lejcti var cidija o Stefan Pišti Horvath ando 23. maj 2019 ande leskero lokal Betschiste Grinzing, kada o biro Rudolf Berlakovich andar Großwarasdorf le leskere barikane muschikane keripeske patijartscha.

stefan štefan pišti horvath časna povelja pisti ehrenurkunde joško vlasich vlašić rudi berlaković berlakovich
ORF

Use sina use ada barikano di te leskero pajtaschi Joško Vlasić. O Serdar Erdost andar i ORF-iskeri flogoskeri grupnengeri redakcija o historischi momentscha le Stefan Pišti Horvathistar odoj upre lija.

Serdar Erdost (ORF), Stefan Pišti Horvath
Serdar Erdost
Serdar Erdost, Stefan Pišti Horvath
Stefan Pišti Horvath
ORF

O ORF ando 9. juni 2019 ando flogoskero grupnengero magacin „Servus, Szia, Zdravo, Del tuha“ ada sikatscha.